ZKIZ Archives

電費加價 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131125/18522194
每年到了十一月尾，就會傳出消息，講港燈（電能）及中電如何申請加價，及電費加價幅度，環保團體及壓力組團體（甚麼關注組之類）必定例牌抗議加價一番，然後工會派議員在議會嘈一大輪，最後政府批准兩電加價，但幅度或者比最初申請低一啲，等環保局有些少面子。
咁嘅圓圈遊戲（circle game）多年來不斷上演，香港人睇到慣，亦唔見有甚麼大抗議，因為香港人並不如工會政客或環保人士咁強人所難，絕大部份尊重法治制度之重要一部份，即合約精神，既然兩電與政府已簽訂利潤管制協議，任何根據協議行事之行為（如按照協議條款加價），還有甚麼好反對的？若不滿意協議內容，應在協議到期、重新談判生效之前，極力爭取修改。協議一經簽訂，政府何能反口？議員怎能煽動政府犯法不按協議條款辦事？民建聯工聯會議員唔識嘅話，算罷啦，橫掂佢哋素來只重視執政者強權，泛民議員口口聲聲維護香港法治制度，點解部份民粹派還要為每年兩電加價大吵大鬧呀？令人不解。
西方政府就可以完全做到尊重合約精神呢一點，與公用公司簽訂協議在合約期間保障投資回報之後，就唔會年年阻住地球轉，阻撓公用公司加價嘅。不少人評論近兩年長實系公司（如長江基建與電能實業）不斷往英國荷蘭澳紐買入水、電、垃圾處理公司等公用事業，可能與「撤資有關」，是否撤資，左丁山唔敢講，不過精明理性投資者嘅任何投資行為，有理性分析做背景，拆解大量數據之後先至有所行動，絕非臨時式、情緒式政治反應。英荷澳紐政府素來尊重合約精神，投資者得到政府保證之後，可以安心依照條款辦事，點會好似香港咁，每年麻煩一次㗎。對工商企業店舖交通工具及不少市民來講，香港最緊要係電力供應穩定，不停電，要電就有電，唔似一啲地方咁，好需要用電時就會突然冇電，至於電費，在世界大城市嚟講，唔算最高昂，便宜過倫敦100%，平過紐約148%，低過雪梨176%，可以收貨啦。