ZKIZ Archives


美國紡織業復蘇 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131007/18452401

前星期,有一位讀者來電郵要求左丁山提供顧問名字,教佢如何由廣東製衣搬廠至柬埔寨、緬甸,因為廣東人工太貴,賺錢艱難,必須諗辦法喎,左丁山唔係工業專家,難以回覆,故此請佢向工業總會或生產力促進局查詢。
十月二日,蘋果B7版報導紡織界靚仔議員,自由黨鍾國斌話已與緬甸當局達成協議,在仰光省和Bago省取得兩幅土地,發展工業園,為期70年,地價係租金一蚊一呎,會招攬香港紡織商到緬甸發展,因為「廣東已經冇得做。」
咁啱,十月一日嘅「國際先驅論壇報」IHT有全版報導美國紡織製造業有復蘇跡象,過往外判俾中國工廠嘅紡織製衣業,紛紛回流,在美國設廠生產,明尼蘇達州之大城市明尼阿坡利斯市尤其興旺,美國紡織廠重新在美國設廠,原因只有一個──成本,皆因中國人民幣升值,中國工人加薪快,其他費用不斷增加,加埋運貨費及船期,好多美國批發零售店計過數,向美國本土工廠落訂單仲划算,好過向廣東香港人工廠落單。
美國國內訂單湧至,廠商頭也大了,因為搵唔到工人也。過往二十年,美國紡織業基本上已全部外判俾中國,27%本土工人已退職,新人搵唔到,明尼蘇達州啲工廠聯合起來組織縫衣訓練課程,但入讀者少,中途退出者又多,遠水、少水不能救近火,惟有向新移民打主意,到柬埔寨、越南人區域大力宣傳請車衣工人,介紹人可得獎金。
全球化去到某一階段,幾乎達成經濟學上之factor-price equalization(生產要素價格同等化)之後,市場就會指揮企業家行番轉頭,生產要素就是土地、勞工與資本。過往美國之土地、勞工、資本價格貴過中國好多,紡織就曾大量流向廣東工廠,經二十餘年發展,即使中國生產要素價格仍然未及美國,但加上交易費用之後,已經無顯著差距,美國人就會諗到,不如班師回朝,在美國製造咯。紡織業二百年來都是如此,由英國蘭開夏轉向美國東南州份,再轉向日本,1960年代逐漸轉向亞洲四小龍,然後往中國,現在香港廠商要去緬甸(人工低廣東七至八倍),但適逢美國廠商話要重振美國紡織業,鍾國斌等人若不快馬加鞭,時機難以把握了。

PermaLink: https://articles.zkiz.com/?id=77081

Next Page

ZKIZ Archives @ 2019