披圖梁每年生日之時，適值馬季開鑼，於是趁機在馬場廂房擺下生日宴，招待朋友。九一一之夜，披圖在快活谷廂房招待各位老友，筵開四席，吃特色西班牙式燒乳豬，紅燒燕窩，大家當然吃得過癮，但大家最關心嘅就係，主人家名下隻馬「海南花梨」可唔可以贏番一場，等大家歡喜呀？「海南花梨」編在第四班第四場，恰好抽籤排得1檔，係1650米最佳檔位，呢隻馬又係放頭馬，賽前試閘跑第一，唔駛策騎指示，都知道隻馬一定會搶頭、沿欄快放，希望一放到底，為馬主披圖賀壽啦。
戰術就是如此，問題係騎師楊明綸是否可以完美執行，一眾嘉賓好緊張呀。吃過燕窩之後，披圖梁率領大隊落沙圈睇馬，左丁山就未睇先捧場，搵隻10號食全餐先至講。臨場披圖目光如炬，話隻12號「香港發」最有狀態，一定要拖埋。一出閘，果然一如所料，「海南花梨」係咁放，放到過咗電算機，開始腳軟，眾人齊呼「頂住，頂住」，好彩，捱到過終點，贏12號「香港發」四分三馬位，嘩，幾十人拍晒手掌，趕住落看台影拉頭馬相咯。事後睇番，「海南花梨」末段跑24.09秒，慢得交關，總之披圖梁夠運啦，贏咗就算，彩金加埋淨獎金28萬元，披圖名利雙收矣！
跑馬不忘論政，當今房屋、土地與政治不可分，講起披圖之英皇師弟梁振英與林超英之「開發郊野公園」事件，大家意見多多，特首之英皇學長天真許話，講吓都得啩，不明林超英為何講到咁決絕──諗都唔好諗。左丁山當然認為談論、評論開發香港郊野公園，大有價值，起碼可以透過一個大辯論過程，澄清香港人對房屋、土地、保育、環保四大方面所產生之衝突與矛盾，有一個清楚嘅闡述。係人都知香港開發新地，起碼講番十年八年，唔係今日講，明日就可以在郊野開山劈石，社會上有不少人話香港有大把地，左丁山就不知地在何處，郊外確係有好多空地荒地嘅，不過一話開發箒，就馬上招來反對聲音不絕，難搞到極，王岸然講及郊野公園有助「地產霸權」，唔係冇道理㗎。 