📖 ZKIZ Archives

中秋月餅 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130919/18428840

沙田陳太買咗一部Panasonic麵包機後，整麵包越整越靚，陳生幾乎唔敢再去city'super買麵包，驚老婆有面色俾佢地也，最近陳太又用麵包機製造埋pizza，用正心機調製，做好送來一個叫我地試吓，又真係好味噃，日本人製造家庭電器，真有心思，單係呢部麵包機，足以令家庭主婦、退休女士忙個不了，開心到極。左丁山與陳太講，「不如你試吓用麵包機整月餅。」當然係開玩笑箒，你估咁易咩，要做亦唔係用麵包機啦。
今日係中秋節，家裏月餅多到食唔晒，曾有朋友介紹買福臨門月餅，正宗人手製，不用機器咁話，聽到心郁郁，但一聽價錢，要六百八十蚊一盒，立即打退堂鼓，唔駛食咁貴嘅月餅呀嗎，其他牌子，大都係百幾蚊一盒箒，朋友瞪眼望左丁山：「仲以為你係食家㖭，咁孤寒做乜，最多我送你一盒！」送都唔敢要，雖然自己唔係公務員，但接受一盒六百幾元價錢嘅月餅，有點兒那個噃。
聽講最暢銷之月餅係半島奶黃月，每年有親戚訂下一大批，送俾商業客戶及近親，左丁山因此受惠，食落覺得口感始終與傳統月餅差一啲，唔習慣。飲食專家F特登搵朋友送來嘅三家奶黃月餅試食，然後報告佢嘅口味排名，結果係奇華第一，美心第二，半島第三，另外食家Y吃過多款奇華月餅，佢最鍾意陳皮紅豆沙月，左丁山呢，就要多謝老友蔡瀾送來澳門鉅記傳統月餅，有啲事物，還是老的好。半島奶黃月餅雖然不盡如人意，但半島嘅home made朱古力就認真無得彈，左丁山吃完又吃，要老婆喝停。醒起有親戚自多倫多回來過節，要飽嚐香港美食，於是立即打電話到陸羽訂枱吃十大名菜，又打電話到半島訂枱吃自助餐，半島生意興旺，連續幾日滿到瀉，冇法啦，親戚可能無口福吃到香港比較最精緻嘅自助餐咯。一個中秋假期吃個不停，難道不怕血壓高、膽固醇高？騎騎，有對策嘅，本人雖有血壓高，但膽固醇低於警戒線，雖然日日係咁食，但膽固醇水位與2007年一樣（每年驗一次），想來與勤力日日路上行，未免腳拂拂有關也。

PermaLink: https://articles.zkiz.com/?id=75657
Next Page
ZKIZ Archives @ 2019