奧巴馬好心做壞事，以為強迫企業為僱員買醫療保險，可以保障工人，誰知道請人最多嘅中小企負擔唔起，立即盡量將啲全職工人變為兼職散工，大企業有幾萬幾萬咁多工人，冇法子大減全職員工數字，咪㩒低加薪幅度，令員工薪水追唔上通脹咯。在資本主義國家，此乃必然道理，政府干預勞工市場運作，必然產生副作用。
香港目前仍然無政府政策直接干預勞工市場，但如果將來順從工會意見，每年提高最低工資、標準工時立法，不准強積金對沖，甚至設立全民退休保障等，大有可能產生不良後果。當然社會上有社工界人士，環保組織及憤青認為香港目前要講分配，不以發展為優先，但若經濟不向前發展，分配只會是零和遊戲，觸發階級之爭。例如五至七月份，統計處發表失業率為3.3%，處於極低水平，但15歲年青人之失業率數字係17.2%，高到令人難以置信，或因年紀太小，僱主不敢聘用有關，至於20-29歲組別，失業率係6.1%。為何各行各業都高呼請唔到足夠工人之時，年青人嘅失業率就偏高？機場內有大把工冇工人噃，HAECO試過話請唔到工人而發類似盈警啦！
建造業尤其是缺乏年青人入行，全行平均年齡在五十歲或以上，新人接不上班，年青人到建造業訓練局參加職訓班，唔駛交學費，仲有生活津貼收㖭，但一位資深工程師對左丁山講：「一年頂多只有幾百個年青人入建造業，但又有報紙話年青人失業人數超過十萬，我都唔知啲人去咗邊！」真係口同鼻拗，如果你問發展局，官方立場就話香港有30萬註冊建築工人，有22萬人就業，部份開工不足㖭！資深工程師就話活見鬼，搵多個熟練技工都冇呀，究竟係坐在冷氣辦公室睇數字嘅官僚啱吖，還是日日在前線趕工嘅工程師啱呢？左丁山係行外人，唔敢判斷。熟練工人供不應求，可否輸入？官方話已有機制處理，但聽聞有人依照機制申請輸入德國技師，但移民局駁回，話技工冇大學學位喎，看似有啲道理，但移民局啲官員或有所不知，德國技術工人有學徒制，走呢條道路唔駛讀大學㗎！ 