| ||||||
上週六，本刊替書中嘅專欄「天下第一倉」倉主艾薩Isaac，搞咗個投資講座，與本刊讀者見面及解答投資疑難。此活動由財經組一手包辦，參與讀者人數有八十幾人。我哋特登揀咗喺本集團總壇、即係將軍澳堆填區之上舉辦，讓讀者望一望、聞一聞、感受一下本集團之「氣息」。 這次場地，租的是公司攝影棚，茶點由五樓的食堂提供，司儀、聯絡及工作人員，亦是財經組記者，全體總動員。事前有同事開會一問：「怕唔怕有人混入來？」係喎！本刊咁多牙齒印，難保不會有行家或仇家潛入搞事。咁邊個做門神及守廁所呢？幾個同事舉起手自告奮勇，還即入廁所「踩線」！好彩，活動最終順利進行：無傻佬、無仇口，而且天公造美，一啲垃圾臭味都無。讀者質素，是最大驚喜，成場並無問number的牛頭角順嫂。有讀者從創刊開始幫襯，有的看過以前的專欄「東尼信箱」，「過底」到艾薩。讀者洪先生帶太太來，佢話跟艾薩買莎莎（178），贏咗錢已出咗幾轉埠；廿歲的Ryan是港大會計及金融系學生，向聘請佢做實習嘅投行借錢，再加補習儲來的幾十萬投資，跟Isaac買中航信（696）等，現時投資總額達一百五十萬。大部分讀者都滿意今次活動，亦求「知」若渴，向我們建議搞地產等更多講座，增進知識。你們的要求，都收到！詳情請留意本刊公布。 （區嘉儀） | ||||||