今年左丁山收咗一位泰國女生為mentee，試嚇做學長。過往都做過㗎，不過啲大學生似乎仲忙過自己，除咗一位之外，其他四位未試過一次主動聯絡左丁山，幾乎成年冇見過一次面，於是左丁山退出學長計劃。為咗與mentee交流，當然要不時留意泰國新聞，與泰國賓架R及其他泰國朋友談話攞料。最近搵到一張舊相片，係與泰國知名經濟學家阿瑪博士合照嘅，阿瑪博士當年自耶魯返回曼谷法政大學教書，研究泰國特有問題──Rice Premium（即泰國米出口稅），大聲疾呼反對，但政府好少理會佢。泰國盛產白米，白米出口係泰國一個主要創匯來源，但歷來政府恐怕國際米價貴，出口太多，益咗商人，但不利泰國人民每日吃飯，於是向出口米徵稅，防止過多食米出口，阿瑪博士認為咁樣係扭曲市場，反效果係壓低國內米價，對米農極為不利。
好嘞，快速移動至2011年10月，泰國女總理英祿上台，實行競選承諾，大幅度提高白米購買價，每噸一萬五千銖，明益農民，農民自然歡喜到極，但最高興嘅係有組織貪污集團，利用米價補貼貪污圖利，賺到盤滿缽滿，受最大損失嘅自然係納稅人，2011/12年度政府已損失44億美元，倉庫積存一千七百萬噸穀米，行將敗壞，如果將呢批米在國際市場拋售，米價必跌，累死泰國白米出口商，如果收埋唔賣，白米就快變壞，送都冇人要，政府損失慘重。英祿啲笨計就係泰國收埋啲米唔賣，令國際市場缺米，抬高米價，泰國米先至出售，賺番一筆，但在全球化之下，越南與印度一聲唔該，泰國唔出口咩，佢地就搶佔市場，越南米每噸只售365美元（約一萬一千銖），打到泰國米商投降。泰國稻米政策委員會因見政府累積虧損太大，宣佈六月底調低收購價至12000銖，既得甜頭利益嘅泰國農民高呼抗議，要入曼谷示威，英祿政府簡直失了方寸，不知如何是好。左丁山屢屢在本欄反對社會主義政策，反對政府派利益（因易放難收），泰國立即提供一個活生生例子，香港好多泛工黨議員，明白未呀？
（代郵：「伴你啟航」創業論壇，馬雲、謝霆鋒、陳志雲等人對話，因索票人士接近一萬，「九展」無法容納，今日移往機場亞洲博覽館舉行，時間照舊。） 