ZKIZ Archives


21天找數 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130608/18288770

講起找數期,事有湊巧,接連碰到幾位大判、二判。判頭制並非一些淺薄人員所講,層層剝削制,其實一個建築地盤有好多工程,發展商搵大建築公司承包工程,建築公司就要分工種搵水喉、水渠、泥水、紮鐵、石屎等等不同判頭開工,一切價錢傾到你情我願,並無剝削可言,之不過有啲發展商做壞規矩,成日唔找數,所以過往曾發生判頭持刀上寫字樓搵大老闆夫婦事件,又有不肖承包商收咗發展商(或者係政府)錢,硬係唔找數畀各類判頭,釀成糾紛。
一啲人計死數,以為遲遲唔發放承包費,對自己有利,殊不知,小判頭為咗工錢揸頸就命之餘,暗中會做手腳報復出氣,例如將近完工之際,丟啲唔硬唔軟嘅垃圾落水渠,令到樓宇落成之後,污水渠硬係塞塞地,又如弄吓手腳,令到新樓窗門一有雨落就滲水漏水,呢呢,夫妻檔發展嘅樓盤就比較多呢啲濕滯嘢,你估純粹係意外乎,試得多,品牌受損,賣新樓嘅樓價及以後二手樓價都平過市價。
呢日見到呢位大判,就話某大上市建築公司非常好人,找數又快又準,21天內有錢收,同呢間公司做事,零舍爽神。原來判頭唔怕冇工程,只怕做完收唔到錢,浪費時間兼得個吉,左丁山問佢:「建築公司好少咁疏爽嘅噃,點解呢間咁有良心?」判頭話:「我諗有冇良心係價值判斷,好難評估,不如話呢間建築商非常醒目,係市場領導者,睇見目前判頭難搵,工人難求嘅局面會維持多幾年,而佢手上又有好多單,為咗保障『供應』,佢索性以最短數期,最準數期呢兩項條件嚟吸引我地幫佢賣命。」找數找得快,會產生乜嘢好處?判頭話:「因為其他公司唔願找數,或太慢找數,咪有好多判頭爭佢嘅工程做囉,多人爭,價錢自然冇咁好,我同呢間公司做嘢,利錢低好多㗎!」唔,一切反映在市場價格,找數快而準嘅公司,可以收到較低投標價;找數冇時準嘅公司當然收到較高投標價,甚至冇人肯落標!判頭話今時今日建築工人空前缺乏,特區政府怕咗陳婉嫻李卓人,一遇到建築行業要求輸入勞工(向新加坡學習而已),高官就叫建築界收聲,故此判頭話西九高鐵呢啲大工程,唔超支有鬼!

PermaLink: https://articles.zkiz.com/?id=57038

Next Page

ZKIZ Archives @ 2019