| ||||||
中環歌賦街的牛記茶室被業主嫌棄「無特色」兼大幅加租，週日正式結業。牛記名氣雖不如同街的九記牛腩，但亦有不少「粉絲」，最後都「冇得留低」，相反九記旁的一間小型印刷廠，卻能「冷眼旁觀」。走進鋪內，時間好像凝固了，古舊印刷機「咔嚓咔嚓」地吐出一張張紙品，七十二歲的強興印務老闆鄧偉強，穿着白色背心，埋頭切卡片，是附近奶茶名店蘭芳園的公司卡片，公司亦承印請柬、信紙及信封。鋪頭看似凌亂，其實內部一分為二。另一邊是偉豪印刷膠貼公司，老闆是比他小三歲的張少偉。他們是鋪位的共同業主。 「我同張生七八年已經喺結志街夾份租鋪，佢專做label（膠貼），我做卡片。各有各做，無利益衝突，有合適嘅客仲會介紹俾對方，先可以夾到咁耐。」鄧偉強停下手中工作道。他眼前這部切紙機，已是七二年出品，「古董嚟o架，賣出去都冇人要，只能當爛銅爛鐵咁回收。」他那兩台印刷機，以及張少偉的兩台印膠貼機，都是八十年代產品。「以前結志街、歌賦街全部都係印刷鋪，隔籬九記嘅鋪位都係做印刷，廿年前百幾萬賣咗俾九記。」戴着賊仔帽的張少偉指着前方的高級家品店HOMELESS續道︰「嗰度以前有間報社叫《紅綠日報》（戰後報人任護花創辦的小報）。」
老式經營，來幫襯的主要是附近的餐廳或公司熟客，間中有外國人來印請柬。兩位老闆異口同聲指每月只支取萬多元人工。多年來，生意原地踏步，鋪位市值卻水漲船高。鄧承認︰「個個星期都有經紀打來叫我哋賣鋪，有次開到五千萬。」簽個名就「發達」，他們卻耍手擰頭︰「我哋只求搵兩餐，唔係要發達，執咗咪無嘢做？」鄧偉強更把女兒及兒子都叫來幫忙，「打自己工好過出去做，仲可以學吓營商之道。」他自詡勞碌命，每天晨運後就回鋪頭，中午愛到附近的蓮香樓吃飯。已半退休的張少偉則較逍遙，愛炒股及跳社交舞，公司交由員工打理。
二人性格迥異，卻是沙煲兄弟，不但未曾吵架，平時還會相約飲茶、打麻雀，近幾年兩對夫婦更不時一起到內地旅行。賣鋪一事，亦看法一致，張笑謂︰「銀紙貶值，不如揸鋪安全。八十年代初，北角城市花園兩房一廳嘅單位才幾十萬，依家升咗十倍唔止。」一旁的鄧偉強即加把口︰「我哋鍾意做嘢，有盤生意做可以過吓日辰，夠食就算。我都知行業已式微，以後真係做唔住嘅，咪租出去。總之，要賣要租，我哋都會共同進退！」 | ||||||