上周更新 (14 Apr - 20 Apr) PARTIPRAL - ROAD TO FINANCIAL FREEDOM
http://partipral-hk.blogspot.hk/2013/04/14-apr-20-apr.html
上星期初恆指曾一度跌穿今年低位, 大市氣氛亦欠佳. 不過星期五傳出MSCI或將內地A股納入新興市場指數, 純粹一則普通新聞, 但竟然能夠帶動恆指借勢反彈500多點, 令人意外. 今年已經經歷過不止一次傳出所謂利好因素刺激內地A股, 港股尤其中資股往往亦會藉以急升, 可惜最後往往無以為繼. 今次升勢會否一如之前一樣只屬放煙花暫時無從估計, 但內地股市早已證明不能再寄予任何期望, 因此無謂因為一日急升而太過上心.
金價大跌為本週矚目財經消息, 塞浦路斯賣金救國, 虛擬貨幣Bitcoins大跌, 甚至就已知新聞而言根本不可能完全解釋為何黃金, 白銀等貴金屬出現如此爆瀉. 無特殊因素之下出現大舉拋售, 應有好戲在後頭; 現時別人恐慌, 自己其實應該更恐慌. 黃金最大缺點係並不能帶來額外收益, 雖云有能力對沖貨幣崩潰, 但話到底都係大家講個信字. 人類信心從來都太難捉摸, 因此投資投機黃金等從來都只能夠順勢而行. 現時貴金屬市場牛勢明顯逆轉, 衝入場硬碰硬肯定無著數.
今個星期個人組合最大打擊係敏華(1999)大跌近兩成. 周初公司宣佈發行五年期8.5億港幣5釐CB, 換股價$8.25, 而當時股價則為$7.2. 若然最終全部CB獲得行使, 公司將要發行多超過10%新股. 換股債附帶條件有兩個, 其一往後公司全年派息率不得高於50%; 其二如果公司未能如期支付債券任何款項, 會另加每年15%額外違責利息.
單就此新聞而言, 利好在於換股債價$8.25相對當時股價$7.2有超過一成溢價; 利淡在於潛在攤薄效應甚勁, 一好一淡互相抵消. 不過敏華之前並無提及過需要如此擴大資金擴張, 雖然利息5%借到8.5億唔算貴, 但中期報告顯示公司仍持有淨現金超過5億, 實際集資原因不明. 敏華從事製造及銷售沙發, 超過7成出口美國, 其餘內銷. 工業公司忽然借大錢, 正路睇係打算擴張產能: 敏華目前每年能夠生產超過一百萬套沙發, 但每年銷售則未足六十萬套 - 原來產能根本未用盡, 因此擴張產能不可能係借大錢主因.
證實今次借錢並不會對主業構成重大幫助, 敏華忽然等錢洗, 更大可能係打算不務正業. 集資成本唔高, 但唔代表可以借錢唔還; 預期敏華去年賺超過4億, 每年俾多4千幾萬利息即代表純利少一成, 萬一股價升過$8.25, 又攤薄多一成. 整個發債故事對小股東而言, 並非好消息. 消息公佈後敏華股價三日跌17%, 足以反應市場對今次發債並不信任. 自己上星期四$6.7已經沽出一部份持股, 如果下星期有機會重上$6.2左右, 自己亦會將餘下持股先行沽出.
其餘持股方面無特別變動, 繼續加注理文造紙(2314); 另外瑞聲(2018)連跌兩日後, 開始值得留意.