📖 ZKIZ Archives

碼頭罷工 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130408/18219976

碼頭工人罷工（嚴格嚟講，係部份碼頭工人罷工）還未平息，最後結果會係點，難以猜測。香港百幾年來盛行買辦制、外判制，怡和、太古在十九世紀已優為之，一路發展下來，買辦冇咗，承包判頭則無處不在，有不同工種外判商，有不同工作層次的承包外判商，外行人好難了解其中複雜性，故此每有工潮發生，工會與工人往往直接向最大/最後嘅負責公司追討，外判商亦往往乘機低調潛水，希望避過責任。
碼頭工人搞罷工，並非不尋常，左丁山細細個睇公餘場，就睇過年青馬龍白蘭度主演嘅黑白片「碼頭風雲」，近十年就見過不少外國嘅碼頭罷工，由南美到北美到非洲到歐洲，都曾經發生，反而香港碼頭就一直好太平，直至今年先至見到。碼頭工人罷工有好多理由，最常見係要求加薪不遂，比較少見嘅理由係幾年前（根據華爾街日報報導），洛杉磯長灘碼頭工人反對碼頭操作機械化、自動化。
今次碼頭工人罷工主要係要求兩年內加薪兩成，如此加薪幅度，睇怕香港冇邊一間公司會答應。2013年碼頭工人薪水（每日），據「壹仔」報導，以船上抓結員嚟講，係1375元，少於97年嘅1456元（即係少咗5.6%），高於2003年嘅1090元（升咗26%）。香港不少人嘅人工，除咗公務員之外，今天仍然低於97水平，傳媒記者就一定係，左丁山自己嘅媒體收入自2002/2003被削減後，至今未恢復到2001年水平，寫稿嘅稿費根據香港傳統，從來都係有減冇加嘅，頂多不加不減。
碼頭工人的長期薪酬趨勢是悲觀的，原因好簡單，九七前左丁山在其他報紙寫過經濟學概念factor prices equalization，在工業北移後開始，九七回歸後將會加劇，體力勞動工人嘅實質工資（real wages）將會長期受壓，難以上升。當時內地碼頭未掂，船期少，珠三角出口貨須運回香港上船，故此貨櫃車司機在92/93年間有三四萬銀一個月，但隨着鹽田、大鏟灣碼頭搶去香港貨櫃碼頭生意，香港由世界第一變成世界第三，即將變成第四，貨櫃車司機月薪已跌至今時嘅二萬元左右。日本管理大師大前研一曾在香港演講，左丁山聽住佢話：「香港作為航運中心不切實際，日中直航、韓中直航、海峽兩岸直航之後，香港只能做珠三角生意，會被深圳取代！」

PermaLink: https://articles.zkiz.com/?id=54723
Next Page
ZKIZ Archives @ 2019