📖 ZKIZ Archives

不怕官只怕管 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130329/18210439

渣打銀行在三月五日宣佈破紀錄業績，本屬好事，點知董事局主席Sir John Peace答記者問題之時，唔知道係唔係興奮過度，有啲飄飄然，講去年被美國監管當局以違反制裁伊朗為理由，罰款六億六千七百萬美元一事，指渣打並無蓄意犯規，只係文書錯誤（clerical errors）嘅啫。此語一出，美國政府非常不滿，認為渣打全無悔意，實在豈有此理，司法部立即接觸渣打，責成渣打撤回有關言論並要道歉，否則要提出檢控，渣打見勢色唔對，卒之在三月二十一日發表道歉聲明，收回三月五日言論，承認曾經「蓄意（willful）違反美國經濟制裁伊朗之法規！」
點解渣打要咁快跪低？無他者，要做世界級銀行不可能無美元交易，不可能不在紐約結算，一定要受美國管制，正是不怕官，最怕管，衙門大人話一，你敢話二？呢啲事我地在金融界見得多，左丁山嘅銀行界舊同事與大老闆在港英年代就曾經收到港督府便條，請佢地與港督飲下午茶，三個人笑到四萬咁入去，飲杯伯爵茶，食件鬆餅，之後就面青口唇白咁走返出嚟，原因就係佢地曾向傳媒談論聯繫匯率，以為好有言論自由，講出心中話，故此咪「被邀請」入港督府飲下午茶囉。左丁山曾問過舊同事：「港督同你地講過乜嘢呀？」佢只係答一句英文：「Gave us a piece of his mind」，之後佢地就拒絕一切訪問，不再公開評論聯繫匯率。現在又點呢？騎騎，講親聯匯嘅大賓架，等收電話都得嘞。
此乃經濟學教科書講到嘅央行常用之arm-twisting一招，日本人最聽政府話，日本銀行家只要被邀請到日本銀行或財政部一行，包保聽話合作。在陸羽飲茶常常遇到中環名醫，其中一位問左丁山：「梁振英處理奶粉問題有冇用呢招？」唔知噃，如果識運用，怕唔駛赤裸裸咁明令嚴限奶粉出境啦，之前請荷蘭駐港總領事及荷蘭奶粉商到禮賓府飲下午茶，客客氣氣講吓奶粉，對方仲唔識做？怎會「供應不足」噃？依家限奶令弄出大笑話，海關誤把奶米糊當作奶粉，十二人遭海關錯誤指控，可謂貽笑大方。

PermaLink: https://articles.zkiz.com/?id=54082
Next Page
ZKIZ Archives @ 2019