鄉議局主席劉皇發在年初二（二月十一日）按傳統到車公廟拜車公，初二為車公誕正日，鄉議局照正規矩，係要在正日拜祭祈福嘅。癸巳年初二係戊申破日，諸事不宜，雖然劉主席在上午吉時求籤，還是為香港求到支第95下籤，全港一片噓聲，劉主席只係「車公傳話人」啫，大家唔好鬧佢啦。去年佢求到第29中籤：「何為邪鬼何為神，神鬼如何兩不分」，當時大家疑惑不解，依家至明白準到離奇，梁振英先生爆出冷門擊敗唐英年先生，成為香港行政長官，此君言行真係「神鬼如何兩不分」，龍年年尾搞單「律師信」警告練乙錚及「信報」，創香港政客，尤其是係地區最高領導人嘅先河，其為邪鬼乎？但聽佢講扶貧建屋，又講到似神仙打救窮人咁嘅口吻，咁先至得人驚。
沙田陳太睇勻全港報導、分析、評論，特登再問左丁山：「你似乎識識地解籤，半個解籤佬咁，你又有乜意見？」所謂識得解籤，乃經驗之累積。年初四不是開工吉日，坐在家中清理舊物，找出一堆車公廟籤文，自1989年至今，以古鑑今，知道逢係求到上籤，不必太得意，打個五六折就比較舒服啲，求到下籤呢，就不可不理，務必小心。過往多年求到下籤而令左丁山刻骨銘心者有1994及1997年。94年二月十三日年初四求得事業第76籤：「人情反覆似波濤，勿謂金蘭結義高，上古守朋今重利，囊空不見舊同袍」，求財得第94籤：「雞公閉口雞母啼，紫袍換脫素袍歸，名利倒顛心意急，空遊南北過東西」。當年一月，左丁山完成一單公司收購，滿肚密圈，欲大展拳腳，點知新年求到車公下籤，到咗1994年年尾就已經執笠關門，成一生之痛。1997年2月13日年初六，當時炒股炒樓風氣大盛，全港一片繁華景象，迎接回歸，左丁山也想炒番兩手，以求追回94年之損失，但睇經濟數據就驚有泡沫，唔敢郁手，新年去車公廟求得事業籤第32：「聞道今宵是上元，銀燈火樹耀長天，無端一陣狂風雨，萬家燈熄斷管絃。」之前已有94年教訓，得此籤梗係急急賣股，叫人賣樓（但朋友多數堅持要買樓），自己仍然租樓不買，於是97之後嘅「萬家燈熄斷管絃」與左丁山完全無關，逃過一劫。 