📖 ZKIZ Archives

標準工時打硬仗 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121204/18089142
馬主L有公職在身，不時代表商會發言，一個月前佢隻馬贏出，左丁山大嘆走寶，呢日撞到佢，問：「幾時再拉頭馬？」馬主L笑曰：「邊有咁好運呀，吼機會啦。」咁又係，普通馬係幾難一連贏兩至三場嘅。贏到一場已算唔錯，好過以九百萬買入「北京金寶」多多聲。
唔講馬，講吓標準工時諮詢，馬主L話商會一致反對為標準工時立法，工作時間要由市場、企業決定，立法只會增加勞資對抗性與磨擦，好似最低工資咁，因目前失業率低至3.4%，行行請人困難，最低工資（時薪28元）形同虛設，翠華請清潔工都話俾一萬元一個月啦。但當經濟轉弱，各行業裁員之時，工資下限設定於28元，唔減得，到時必定加劇失業率上升。
馬主L曾參與最低工資諮詢，認為商會一時不察，冇諗到飯鐘錢及五天工作問題，吃了大虧，呢次商會一定不敢怠慢，全面研究細節，穩守防綫，寸步不讓。如此說來，豈非與泛工黨來一場大決鬥？馬主L話：「係呀，硬仗一定要打，唔打唔得，勝算不在考慮之列。」嗱，計吓立法會票數，泛工黨（泛民加工聯會）已有29票，加上擁有13票嘅民建聯與工聯會實際上係孖胎，眉來眼去，商界功能組別議員只能負隅頑抗，毫無勝算。
藍領工人嘅工時，反為易搞，一般係八至十小時已經收工，有冇立法皆如是，超時補水亦在各行各業各有一套，行之有效，但香港白領階級就比較少講補水呢樣，特別係主任級（或行政人員最低級別）以上人員，從來唔講補水嘅噃，啲投資銀行家一星期工作七至八十小時，講甚麼補水？一般白領嘅工作時間彈性比較大，例如早上嘆杯咖啡吹水，下午嘆杯茶，不少中環商廈外有白領在外吸煙，呢類奉旨偷閒時間點規管呀？一有標準工時立法，靈活性就冇晒。大公司因僱員多，還可應付，中小企倚賴員工一腳踢者，必受標準工時打擊，好似男人放產假對大公司無損，對中小企就幾攞命，愈多呢類立法規矩，中小企愈難與大公司競爭！
PermaLink: https://articles.zkiz.com/?id=40758
Next Page
ZKIZ Archives @ 2019