📖 ZKIZ Archives

內地客失蹤 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121102/18054589
特區政府在十月二十六日緊急宣佈新招數打擊樓市，希望壓低樓價，當然係梁振英「適度干預」，有為政府嘅具體表現。干預市場就係與市場對著幹，曾司長張局長經常講地產市場與實質經濟背馳，意思係話目前本港出口疲弱，歐洲經濟不景，美國復甦緩慢，香港廠商艱苦經營等等現象之下，樓價應該下跌，不應上升；冇話曾司長唔啱，但佢亦應該講埋目前通脹高，利率奇低，三年內唔會加息，香港樓市供應不足，土地供應有阻滯呢啲推高樓價嘅事實，身為大官，點可以講一半，唔講另外一半呀？得窺全豹之後，仲敢堅持話樓價與經濟背馳？
點都好啦，曾辣招推出後，樓市成交量暫時進入冰河期。上星期日馬王「雄心威龍」出場，吸引唔少馬迷入場，左丁山竟然遇到大經紀在座，咦，週末係地產代理做生意嘅黃金時間，點解皇牌大經紀竟然與太太拍拖入馬場？唔怕走大雞乎？大經紀話：「曾先生一宣佈提高SSD，增設BSD之後，啲客都走曬啦，邊度會走雞吖，呢個星期會好得閒，我申請定放大假都得咯，遲啲恐怕老闆會叫我放無薪假期㖭！」成交量會急降，何時復甦？大經紀嘆一聲：「我啲內地客本來約咗去睇雍雅山房，依家個個都話唔嚟咯，豪宅買賣好靠內地客東南亞客與公司買家，現在全部要交BSD（買家印花稅15%），我一時之間都唔知去邊度搵新客補番數，不如跑嚇馬先。」
後來在沙圈又碰到另外一個經紀S，佢一路睇馬一路問：「你有冇興趣換樓呀，雍雅山房好啱你噃，中文大學全景睇曬，你行路就可以返母校！」譁，邊度有咁多錢呀，一注獨中一億元三T都唔夠買一間屋。經紀S話：「嗱，益你㗎，之前雍雅山房對本地客冇乜興趣，以吸引內地人為主，點知突然之間，樓盤還未正式開盤，已經有咗BSD，發展商急call我地去睇盤，搵本地客！」咁講法，睇怕好多九肚山住客會突然間收到經紀電話，遊說佢地搬去雍雅山房。呢個樓盤原本以為可以攤凍來食，點知有SSD都唔緊要，整招BSD就殺傷力大咯，消化需時呀！
PermaLink: https://articles.zkiz.com/?id=39486
Next Page
ZKIZ Archives @ 2019