派得好投資組合月結 (Oct 2012) PARTIPRAL 派得好
http://partipral-hk.blogspot.hk/2012/10/oct-2012.html
投資組合現時持股狀況:
24% 大快活集團(0052.HK)
22% 永安國際 (0289.HK)
19% 和電香港 (0215.HK)
6% 惠理集團 (0806.HK)
6% 聯亞集團 (0458.HK)
5% 利亞零售 (0831.HK)
4% 永旺 (0984.HK)
14% 現金
投資組合單位面值: 90.90 (+5.1% / YTD: +31.1%)
政府上星期再度出招打壓樓市, 今日林少陽既分析個人相當認同. 基本上首輪SSD推行後之樓價走勢已證明炒家已非推高樓價元兇. 用家主導之下, 首輪SSD只不過將頭一年既購買力壓縮至第二年爆發出來, 現時再將SSD年期加長, 除左確實令二手盤數量再次減少之外, 完全睇唔到此政策有助壓抑樓價; 至於BSD, 當然會直接打擊一手樓樓價以及銷情, 但比較受影響主要都係豪宅. 香港樓市之中, 豪宅同一般用家根本分成兩個市場, 所以對普羅市民而言BSD絕對唔會令你比以前輕鬆上車. 而BSD背後更重要既意義係反映緊政府開始出招出上癮, 過份粗暴干預市場, 香港中共化味道愈來愈濃烈. 當市場欠缺自由度, 又何來再有吸引力?
十月恆指再升近4%, 明顯RISK OFF之下板塊輪流炒作, 期間普遍個股表現皆甚理想. 臨近年尾, 投資者先開始慢慢發現原來今年響股市賺錢係頗為容易. 套用黃子華棟篤笑既一段, 大家去戲院睇鬼片, 散場先知套戲根本無鬼, 入場咁耐原來白驚一場. 仲講緊甚麼危機, 甚麼大選, 甚麼硬著陸, 擔心左成年, 但大家今時今日拉開櫃筒發現原來仲過得好好地, 就會開始明白股市從來不容易預測. 過份投入估計股市走勢, 反而可能得不儐失.
時來風送滕王閣, 牛氣充天之下立心跟炒只需要勇氣, 技術含量反而唔高; 怕死既話立心堅持做好防守, 現時可以做既野實際上唔會有太多, 反而係應該趁機會調節心態, 摒棄眼紅貪念, 胡亂棄關出迎. 就算要搏, 只用現金搏其實已經足夠.
檢視個人組合, 十一月大快活會公佈業績, 近日公司股價明顯借翠華上市又再炒上, 有機會係整個行業估值再度提升, 所以今次無必要太急再沽, 可以等業績出籠後再定去向; 和電近月股價大幅跑輸, 當初買入之時都係當買公用股收息, 暫時未見有特別因素令派息大減, 但單憑估值下調一點都足以拖低股價, 自己持倉水平偏高, 有必要認真考慮如何換馬, 避免因為信心過大而輸入肉; 永安近期升得甚急, 由於個人估計現價$22股息率仍有4.5厘左右, 未算特別偏貴, 所以暫時唔會考慮套利. 呢類老牌公司難得低位買到唔錯比重, 就無謂立亂賣走. 其餘持股方面, 惠理純粹短打, 無太大信念, 仲有空間加多一注, 但上下望10-15%都會打包離場; 聯亞暫無新催化劑, 股價低位橫行; 永旺表現甚弱, 估值其實亦偏高, 幸好8月尾早已高位減持一半, 現時只宜繼續觀望; 相映成趣既反而係利亞, 估值偏貴但股價仍然一再破頂, 自問唔識睇, 都係渣住先就算.
JESSE LIVERMORE名句"BIG MONEY IS MADE BY SITTING.", 要贏錢, 要緊要依然係好股坐定定.