我沒有輸打贏要 （上） 人在中環
http://manincentral.blogspot.hk/2012/10/blog-post_12.html早上起來，收到Athena傳來的Whatsapp Message：「老闆，我尋晚生左啦，母女平安。有時間嚟XX醫院探我吖。」訊息還附帶了一幅BB照片。嘩，兩母女似樣到吖。
我成日都話，女孩子結婚生仔係我公司響「人力資源」方面既最大敵人。Athena離職之前，連續幾年係我公司既Top Sales。不過講到尾，大部份既女同事，其實都係家庭為重。Athena響知道自己懷孕之後，火速同我辭職。以前搵幾多，賺幾多佣，通通都留佢唔住。
不過收到Athena既Whatsapp Message，卻令我諗起一件舊事。
*****
二零零八年。
果一年，雷曼響九月爆煲。恆指由最高三萬二千點跌到落去十月廿七號既不足萬一點。經濟氣氛跌到落谷底，企業對前景既態度變得前所未有地謹慎。零八年既冬天，係我從商以黎其中一個最難捱既冬季。
相比二零零七年，落差就更加大。零七年係公司盈利爆發既一年。Athena響果一年第一次成為Top Sales，所賺取既佣金，接近係今天既三倍。零八年既頭兩個quarter，情況似乎稍稍放緩，但成績依然出色。直至雷曼事件既出現，情況就急轉直下。
我未做生意之前，我都係一個Sales。做Sales既時候，其中一件我最討厭既事，就係sales target同commission
scheme，可以每隔兩、三個月就轉一次。target通常係有調高冇調低，commission
scheme永遠係變得越黎越複雜。我既感覺係，每當老細發現我地原來可以「達標」既時候，target就會提高，然後等你冇咁容易賺到你份佣金，日子就
變得更困難。hit target，有時對Sales黎講，係詛咒。
我覺得老細咁既處理方法，其實係「輸打贏要」。你做到target，甚至超越target，公司派多一啲佣金同Bonus俾個Sales係天公地道，點解
當你發覺原來Sales Team真係能夠meet到target做到數既時候，你又要孤寒唔想俾佢地賺，拿拿臨修改commission
scheme，等佢地下個月賺唔到咁多？Sales係唔穩定既工作，有一定風險要承擔。當公司生意唔好既時候，你又會唔會肯隔兩三個月就去修改
commission scheme，調低個target，等班Sales可以賺返之前賺到既銀碼？
呢個感覺好深刻，呢個感覺，亦一直帶到落去我自己做生意既日子。我討厭每隔兩三個月就要重新適應一個target同commission
scheme既生活。於是我跟Sales協議，每個fiscal year之前，我跟會Sales
Team商議好今年全年既合理target，commission
scheme亦響果一刻就會拍板。往後既一年，大家就跟住呢個年頭既協定去跑數。假如果年生意大好，即使同事們做到既數係大幅拋離原先定落黎既目標，大家
就去賺取應得既豐厚佣金。儘管發放佣金數目超出預算，但Sales的確係跑到數，公司亦因為佢地而賺到更多既錢，我絕對唔會，亦唔應該響年中既任何時候，
因為佢地賺得多，而更改佢地既佣金制度。同樣道理，假如果年turns out係一年disaster
year，生意唔好令到Sales既佣金收入下降的話，大家亦只好認命，target同scheme都唔會響年中修訂，畢竟協議在先，我認為咁樣對大家都
公道。
零七年，Sales
Team經歷左豐收既一年。同事們如願地賺到比平時多好多既佣金收入。金錢可以矇閉好多事情。零七年既時候，大家都愛死呢一個commission
scheme。同樣既commission scheme，同樣既target，響零八年又行唔行得通？
*****
二零零八年，十月。
「CK，我代表我地Sales Team既所有同事，想同你認真傾下我地既commission scheme。」Athena一臉認真地坐響我面前。
我望見Athena既面色，心知大鑊。生意唔好既日子，除左「生意」本身之外，總會有更多相關既壞事會伴隨而來。
我用力地深呼吸了口氣：「講啦。」
「我先強調，我地並唔係輸打贏要…」Athena一貫地淡定：「但事實係，我地發現左，今年既target同commission scheme既計算方法，都有好多唔公平既地方，必須要修改。」
「如果唔改呢？」我問。
「同事既morale因為呢個唔合理既target同commission scheme，已經非常低落。」Athena既眼神異常堅定：「作為Sales，響一間公司裡面搵唔到食的話，自然會選擇離開。現在Sales Team裡面每一個同事，都係咁諗。」(待續)
祝大家有個愉快既週末。