|
||||||
殼王陳國強坐正做無綫老闆，撞啱 今年港姐踏入40周年，落order請來巨星級的劉德華劉嘉玲做評判，嘉賓陣容之鼎盛，近年難得一見。豈料一人一票選港姐爛尾，破晒紀錄收477宗投訴， 俾人鬧爆。無綫管理層大為震怒，下令要有人為事件負上責任。據了解，助理總經理區偉林同非戲劇製作總監、今次港姐統籌經理余詠珊，成為祭旗大熱門人選。唔 似區偉林有六嬸方逸華射住，加上新官上任搏表現四圍辣火頭，余詠珊高危。 余詠珊在無綫頭炮搞《玩轉三周1/2》，動用全台藝員，逼曾姐（右圖）停廠拍劇讓期開工。 兩高層孭鑊 新官上任三把火，上任無綫非戲劇製作總監後，余詠珊積極爭取表現，度出一人一票選港姐，當時，外界已質疑電腦系統能否負荷得到，余詠珊仍大派定心丸：「有 信心做到，系統經得起考驗，因為技術上已試過可行！」週日（八月二十六日）港姐決賽，臨埋門三甲進行投票，無綫伺服器「死機」，臨時改由評判選出，賽果備 受質疑，瘀爆！無面事小，誠信破產事大，賽後管理層問責，已口頭下旨，要有人為事件承擔全部責任，無綫內部盛傳負責製作部的助理總經理區偉林，及統籌經理 余詠珊是孭鑊大熱。「Peter（區偉林）淨係負責睇住個製作部，又唔係港姐嘅committe（委員），加上佢係阿（六）嬸（方逸華）嘅親信，後台夠 硬，未必郁到佢。Sandy（余詠珊）就真係好難講，成件事佢係in-charge（負責），為咗搏表現四圍辣火頭，啲仇家仲唔趁機會做嘢！」一名無綫內 部人員透露。 施壓要珍姐放人 由亞視做到有線，再到無綫坐埋何麗全非戲劇製作總監嘅崗位，余詠珊上任後積極搏表現，間接令其他部門百上加斤；上任不夠一年，已經仇家處處。據指，她試過 在高層會議上，當着所有人直指樂易玲頭寵林峯，唱歌唔得無演技，提議公司不應該將重點放在峯少身上；之前因無綫未獲奧運播放權，余詠珊奉命製作節目撼奧 運，最終搞出收視奇差及被指抄橋的《反轉三周1/2》，一意孤行要全台總動員的余詠珊，不惜用上頭落order向戲劇製作總監曾勵珍施壓，要全世界停廠放 藝員，令拍劇進度嚴重受影響。之後無綫取得奧運播放權，公司曾召開幾次大會，商議安排人手到英國現場拍攝的事宜，余詠珊竟向綜藝及體育科製作主任李漢源亂 落order。「李生做咗好多屆奧運，好資深同熟手，Sandy未做過又要每事問每事管，連帶幾多部cam（攝影機）過去英國都要話事，搞到大家做咗好多 無謂嘢。」一名幕後人員說。 嘉玲撐冠軍 港姐普選爛尾收場，沿用評判評分下，張堅庭的外甥孫張名雅，居然跑贏民望贏幾條街的季軍朱千雪，被指造馬。但評判之一的劉嘉玲，則直言冠軍是五個評判的心 水。「以前我淨係睇個樣靚唔靚，而家會睇埋學歷、內涵。季軍個樣係好sweet，至於淡定、大方，冠軍呢方面比較優勝。」嘉玲說。季軍朱千雪輸冠軍贏民 心，有消息指無綫會安排她和劉華合作，跌個桔，得個橙，今屆港姐，多surprise。 諸事不順 余詠珊去年11月上任無綫非戲劇製作總監後，一心進行改革，但無綫的綜藝節目質素每況愈下，收視亦未見起色。余詠珊上場後除了與樂易玲鬥法，又試圖公器私用，引入大批有線舊將，其統籌的節目又被指抄襲，諸事不順。 公器私用 余詠珊幫手硬銷老公何哲圖任行政總監的星煥旗下藝人，個個車輪轉輪流上無綫節目高曝光，在優秀選中，十二首金曲，星煥更離奇佔五首，引起東亞及英皇不滿。 益自己友 不斷安排有線舊愛將加入無綫，包括她一手發掘的黃翠如、洪永城、陸浩明等，當中黃翠如除了擔正新劇《心路GPS》，更獲安排做《皆大歡喜之溏心風暴》主持，但阮兆祥拒做陪襯，余詠珊唯有讓步。 抄襲節目 余詠珊的頭炮重頭節目《玩轉三周1/2》，動用全台共329名藝員幫手演出，可惜收視、口碑都差強人意，更被指抄足美國趣劇《MDDtv》和日本搞笑劇《志村劇場》，被外界鬧爆。 |
||||||