| ||||||
689梁振英上台後，一直想伸手到財金範疇，早已係公開秘密。小宗收到風，689之前帶埋傻強（財經事務及庫務局局長陳家強），訪京拜見財金官員，有工行（1398）高層同689呻，話國家四大銀行中，中行（3988）、農行（1288）同建行（939）喺中環都有總部，偏偏工行無份，要689幫手搵塊地俾工行起總部。 呢啲咁嘅建議，香港官員一般都會以應酬式口啓敷衍了事，一來做唔到，二來政府唔應該介入。點知689竟然話會考慮，返來仲喺政府內部開會時，話「我哋要諗吓點樣幫佢哋搵幅地」。有知情官員形容，689咁認真，擺到明係為咗「找人情數」：「中區仲邊度可以搵地俾人？不如俾門常開，或者喺添馬艦軍營挖地囉！九龍有地呀，工行又唔鍾意嘛！」貴為四大銀行之首嘅工行，06年來香港上市，依家仲租緊金鐘花旗銀行大廈做寫字樓，確實幾失威。睇番另外三間內銀，中行最威水，舊中銀大廈早喺1950年落成。90年，再搬入新中銀，由著名美籍華裔建築師貝聿銘操刀設計，曾經係全亞洲最高嘅大廈。當年，有指新中銀和旁邊嘅花旗銀行大廈頂層形成尖角，「邪住」滙豐。獅子行於是喺大樓頂層加裝兩座炮台，炮口對住中銀，反擊對方嘅殺氣。99年落成嘅長江中心，亦刻意設計得四四方方，抵擋中銀嘅「刀鋒」。05年上市嘅建行亦好快手，同麗展（488）嘅林建岳合作，重建舊麗嘉酒店做商廈。去年底，改名做中國建設銀行大廈。10年上市嘅「初哥」農行，知道好難喺中環搵地，去年豪擲近四十九億，向樂聲電子（213）及花旗旗下Apollo投資基金買入干諾道中50號全棟，變身農業銀行大廈。依家中環插針都插唔入，工行慢咗咁多拍，睇怕都要學農行「借殼」先得啦！ 壹計就明妹仔大過主人婆？ 本欄找來有二十多年經驗的資深會計師林智遠及鄔碩晉，每期踢爆一間上市公司的會計陷阱，股民入市前睇清睇楚，一計就明。新股熱潮還未退卻，今次談一下趕乘尾班車的海螺創業 （586）。海螺創業從事節能環保方案的業務，當中包括餘熱發電及垃圾焚化等項目。全球環保意識大增，應有一定作為，可是上市文件內列出的營運數據，並不特別吸引。營業額由2010年的18.1億元（人民幣，下同），輾轉下跌至2012年的12.5億；同期的毛利率亦由35.9%，下跌至32.2%；兩項主要數據的走勢均不利。然而，海螺創業2012年的稅後溢利竟是14.2億。溢利比營業額還要高，倒不是常見的情況。實際的緣由，是海螺創業經聯營公司，間接持有18%海螺水泥（914）權益。海螺水泥2012年的溢利是64.9億，18%約為11.7億，這部分以權益法納入海螺創業的合併收益表，便令溢利數據立即亮麗起來。可是，海螺創業對海螺水泥沒有控制權，納入合併收益表的聯營公司利潤，理論上只是會計上報表處理的方法，不能直接運用作派股息之用，計算營運現金流的時候亦會被剔除。實際上，海螺創業從海螺水泥收取的股息收入，是對現金流唯一有幫助的項目。若只專注海螺創業本業的話，溢利水平便會大縮水。2012年除稅後的本業經營利潤是2.5億，只及11.7億應佔聯營公司利潤的2成多，差距十分明顯。再看營運現金流，淨流入更只有1.5億。營運現金流及不上經營利潤的狀況，是持續發生，不是個別情況。2011年是3.2億利潤對1.6億現金流，2010年是4.5億利潤對2.2億現金流。大家的眼球若只被大額的應佔聯營公司利潤所吸引，便無法理解海螺創業實際的營運弱點。（鄔碩晉） | ||||||