羅老太傳戶口攞唔到錢
1 :
GS(14)@2018-02-12 07:14:56【明報專訊】羅氏家族「溏心風暴」又有新發展，喺羅老太狀告匯豐今早再聆訊前夕，又有人爆料話羅老太喺工商銀行嘅戶口，因為近日搵唔到三仔羅嘉瑞同大女羅慧端加簽，連喺銀行攞錢畀律師費同私人支出都唔得，徬徨控訴「親生仔不如近身錢！」又話如要真心孝順嘅話，就幫佢攞番係工銀同匯豐信託嘅財產。
控訴「親生仔不如近身錢」
據講羅老太喺1月19日同1月22日下晝，通知羅嘉瑞方便時到佢寫字樓搵佢加簽銀行文件，但就無回音，去到2月1號決定搵律師代佢處理。呢個工銀戶口運作咗10年左右，早年開戶時授權老三或大女任何一人副簽，但發覺入稟撤換匯豐信託後個戶口運作就唔太順利。佢同律師已着手處理改變簽名程序。羅老太話，就算唔可以喺工銀攞錢，佢財政暫時仲可以應付到。 羅嘉瑞明言，一如既往唔講私人事，加上家族事件進入法律程序，佢同羅慧端都唔能夠回應喎！
不過另有消息人士話，羅嘉瑞、慧端，以至協助處理羅老太個人銀行戶口嘅會計，都無收過任何羅老太嘅直接授權或指示，反而會計近日收過一啲無憑證同單據嘅巨額付款要求，當中並無羅老太嘅直接授權，又無羅老太簽署，所以先處理唔到。佢哋唔方便揣測相關言論係唔係想影響司法判決。有知情人士話，羅嘉瑞希望羅老太身心健康，冀家族風雨早日平息。
email:
[email protected]
[小琴密語]
來源:
http://www.mpfinance.com/fin/dai ... 1768&issue=20180208