中環在線：Webb：你要知道金利豐的事
1 :
GS(14)@2018-02-04 23:50:44俗語有云，人紅事非多。早前金利豐（1031）被證監會點名股權高度集中，20名股東佔超過九成股權，街外股東只揸緊8.347%股權。「股壇長毛」David Webb當然唔會放過，日前就撰文話畀股民知，金利豐隱藏於公開資料中嘅真面目。
David Webb以「金利豐：你要知道的事」為題發表網誌，話證監會嘅警告係姍姍來遲。首先講吓金利豐股權分佈，行政總裁朱李月華（朱太）持有74.61%，但其實佢仲揸住37.5億股可轉換優先股（CPS）。呢堆CPS同樣有息派，只係無投票權。若全數兌換為股份，朱太實際持股可達80.09%，金利豐市值亦會暴漲至約1,055億元。金利豐股價舊年起一直升，但係睇番有形資產淨值（NTA）88.13億元，計埋CPS，截至去年9月底，每股NTA只有0.508元。以昨日收市價計，亦即係金利豐係以每股NTA的11.9倍買賣緊，如果以0.508元買賣，股價跌幅逾9成。有趣嘅唔止咁，朱太以「殼后」見稱。CCASS顯示，旗下金利豐證券持股逾30%的上市公司，多達58間；持有20%至30%股權，就約25間。大部份都係股東押咗股份畀金利豐。眾所周知，朱太爸爸李惠文係澳門賭廳廳主，呢個可能係金利豐可以提供低息貸款原因，不過Webb就話，佢就唔打算係度落注啦。李華華
來源:
https://hk.finance.appledaily.co ... e/20180201/20292156