ZKIZ Archives


會師中環:Big 4的加薪壓力

1 : GS(14)@2018-01-15 03:04:39

「十幾年前起薪點一萬蚊鬆啲,依家起薪都係得萬三四。」呢句說話係出自一個Big4合伙人。到底十幾年前Big4實際人工有幾多,我後生,未經歷過。但以我所知,整個薪酬架構的確有一段長時間無甚增長,當年大家對加人工都毫無期望。根據前輩所說,呢個情況維持了「冇十年都有八年」,直到到早幾年前才開始有所改善,人工加幅追到通漲,大家亦漸漸對每年九月嘅薪酬調整「雙眼帶着期望」。不過,為員工帶來期望係一件好危險嘅事,尤其係人工方面。正當往績預示好結果,反高潮就會出現,而Big4人工調整係過往兩年就出現了兩次反高潮:2016年畢馬威(KPMG)減薪及2017年羅兵咸永道(PwC)凍薪。前年KPMG減薪尚算情有可原,畢竟有大客如匯豐離開,難免要開源節流,可惜員工用腳投票,東家唔打打西家,員工不停流失,嚇得公司第二年頂硬上將人工加至與市場同步,以免失血過多。誰知上年PwC又突然離奇凍薪,月薪由Big4最高變最低,龍頭公司亦保不住員工,結果重蹈KPMG覆轍,淪落到近幾個月要瘋狂請人填位。這兩個故事均說明了一件事,就係十年如一日的薪酬已不合時宜,Big4員工已經預期每年加人工,多少是後話,但一定要有,否則員工便會紛紛跳船。相信前車可鑑,來年老闆們將感到不少加薪壓力。神仙丁《審計搵丁》負責人
http://facebook.com/AuditSlave/本欄逢周五刊出



來源: https://hk.finance.appledaily.co ... e/20180112/20272405
PermaLink: https://articles.zkiz.com/?id=346717

Next Page

ZKIZ Archives @ 2019