📖 ZKIZ Archives

總統套房 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120606/16400940
曾特首出外訪問，過去五年有49次，有41晚住在酒店內最貴或次貴嘅房間，備受批評。到咗六月十四日之立法會答問大會，曾特首不知如何應付一群如狼似虎，棒打落水狗嘅議員，即使平時同佢老友慣嘅建制派議員，相信到時冇一個會為佢出句聲。
左 丁山從來冇資格住總統套房，只曾受招待「參觀」總統套房幾次，因此不知道住總統套房一晚嘅價錢，審計署呢次列舉六個個案，先至開下眼界，知道房租原來係咁 貴，即使明日執到幾噸黃金，都會覺得入住總統套房係好肉痛一回事。出外旅遊、訪問、公幹，有幾多時間會留在房間內呀？頂多睡覺八至十小時，房間內其他景觀 及設施，甚少機會享用，唉，瞓覺啫，何必幾萬港元一晚？
一位酒店人士話俾左丁山聽，倫敦文華東方酒店係名人訪問倫敦時之喜愛居所，溫總理到英國， 就住在總統套房，總統套房樓上還有價錢更貴之「皇室套房」及「帝國套房」，現在住一晚總統套房大概要三千一英鎊，計番港紙就係四萬七千幾，曾特首在08年 6月入住四晚，每晚用46826元，房間面積968平方呎，為咗方便早上開會喎。酒店人士亦講到，領導人級數入住酒店，為咗保安理由，不能住普通房，尤其 是來自政治緊張嘅國家嘅領導人。之不過，香港一向太平，保護特首不用過分緊張，特首出外旅遊，若不自覺自律地收斂，就會產生今日之羞辱情況。
一位 朋友剛自內地回來，睇到曾特首新聞，另有角度批評，佢話：「曾先生做香港公務員幾十年，最大特點就係不懂國情，毫無警覺之心。喂，你做特首咁耐，同西方咁 多來往，你估中央唔會有人睇實，掌握一切活動資料呀，如果唔信，就係 simple and naive嘅番書仔，抵你死！既然一切活動難逃天眼，就要諗到呢啲資料有日可能被人放出去嘅啦，至於幾時放，視乎政治需要嘅啫。」唔，香港就是有人不懂， 名人內幕即新聞，新聞與政治不可分，英國前首相貝理雅最近談及與梅鐸之互動關係，雖然講得含蓄，我地聽得明嘅！
PermaLink: https://articles.zkiz.com/?id=34154
Next Page
ZKIZ Archives @ 2019