📖 ZKIZ Archives

電子教科書 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120515/16336517
讀者 Arrow來電郵話一部平價$599嘅 tab（平板電腦）「已足夠有餘去 run所有中小學的電子程式」，電腦 S認為冇可能，除非啲所謂電子書只係將現有印刷課本數碼化之後上載入電腦，但新出嘅電子書有好多互動功能，利用圖片、動畫、影像嚟顯示電子書之靈活性及優 點，故此需要更大記憶體。
以此再問出版 M，出版 M嘅答覆話佢唔知一部$599嘅 tab有幾大記憶體，佢策劃中嘅一本小學一年級電子書，上下學期兩冊，共佔4G記憶體，以此類推，讀者 Arrow嘅講法似乎過份樂觀噃。關於無限上網及 Wi-Fi方面，左丁山識得嘅學校就唔係全校可以 Wi-Fi上網，安裝系統要錢，每年維修要錢，學校請一位電子電腦技工要錢，並非間間學校都係喇沙、男拔女拔咁富有，如果教育局唔大量增加撥款，在全港推 行電子教學，的確有問題。
Arrow君又話年年用千幾蚊買新書，好貴。其實學生坐校巴，一個月已要成千銀，比較之下，書價點解會係大負擔？即使一 個學年用三千元買書，攤開十個月嚟計，每個月用三百元，少過每月每日買兩張報紙，家長送孩子學鋼琴、小提琴，每小時幾多錢？請 Arrow君調查吓。確係有家庭冇錢噃，但政府一向有提供書簿津貼，每年政府支出三至四億元！
電子書，書本電子化，確係世界大勢所趨，但直至今時 今日，尚無一國有百分百電子教學成功經驗，英國電子書電子教學因使費太大，英國政府削減預算，已經向呢個項目開刀；喬布斯生前大力宣揚電子書，但美國式電 子書到目前為止仍以大學用書為主。在小學幼稚園教育方面，阿里桑那州 Kyrene School District（上網一查即有）自2001年得選民公投撥款四千五百三十萬美元為一萬八千名幼稚園至第八級學生全面推行電子教育，公開考試結果係令所有 納稅人失望嘅。矽谷有一間學校叫 Waldorf，教書不准用電腦，學生不准用電腦，最常用嘅教學工具係鉛筆，咪好落後？哈，學生多到收唔晒，學生家長來自 Apple、 eBay等科技公司，奇怪嗎？
PermaLink: https://articles.zkiz.com/?id=33690
Next Page
ZKIZ Archives @ 2019