要求和諧 左丁山
http://hk.apple.nextmedia.com/template/apple_sub/art_main.php?&iss_id=20120423&sec_id=12187389&art_id=16271998&cat_id=255&coln_id=22入到馬場，碰到馬主Ｒ，首先恭喜佢隻馬上個月爆大冷，贏幾個馬位，由頭放到尾，明顯超班，以後有排贏。點知馬主Ｒ話：「隻馬跑完再操兩課，發現隻腳腫起，
休息一個星期，仍未消腫，於是再出再贏嘅大計冇晒咯！」跑馬就是這樣的，老牌馬主對此已有經驗，唔會覺得點樣，但一啲新進馬主就會激到紮紮跳，幾乎連練馬
師都鬧埋。想當年，馬主Ｈ初做馬主，連續兩隻新馬都跛腳，養馬三年連沙圈都未落過，馬主Ｈ㷫到彈起，咁又有乜符？
跟住碰到另一位馬主，佢唔講馬，
竟然同左丁山講政治，對左丁山講：「喂，為你好，講一句，以後你最好加入香港營，為香港大和解盡一分力。」嘩，何德何能呀，一枝禿筆，何能促進和諧，寫下
馬仲輕鬆啦！馬主話：「你有所不知，西環好想商界專業界大和諧，一同支持候任特首，為梁特首締造團結建港條件。」
講得咁虛，唔實嘅，即係想點？馬
主話：「唏，唔好扮聽唔明，嗱，西環好重視九月立法會選舉，希望支持者全部勝利，明白未？」講到咁白，當然明，如果九月立法會選舉中，泛民議員全部當選，
甚或增加席位嘅話，梁特首想做強人施政，會有難度，此外在功能組別方面，如有任何「挺梁」議員嘅獲選程度不足嘅話，分分鐘會棄車保帥，搵更有機會嘅新人上
車，以保住立法會議席，維護梁特首。使唔使咁現實呀？政治是殘酷的，挺梁議員唔慣「秋後扇」呢套，千萬不要行入熱氣廚房。
既然咁現實，除咗民建
聯、工聯會呢啲死忠分子，任何其他人不算是「建制派」議員，隨時可放棄。據悉最令西環唔爽嘅就係自由黨，居然在選舉時公然聲稱投白票，完全漠視西環挺梁指
令，簡直大膽妄為，一於要自由黨泡沫化，最好搞到自由黨在立法會一席都冇！上星期報紙報導自由黨人退黨，斷不是事出無因嘅。至於啲獨立「散人式」議員，如
果被發覺選民支持度不夠嘅話，就會有新人受鼓勵去挑戰嘅嘞。
猛咁講政治唔講馬，後果真陰功，左丁山居然填錯飛，白白走失一條成萬銀嘅冷門四連環，慘呀！