ZKIZ Archives


買新相機被田蕊妮問話杜汶澤:吓…哦…

1 : GS(14)@2017-02-18 09:51:49

近年杜汶澤因為被大陸封殺,搞到工作量大減,最近就主力拍緊自導自演嘅電影《空手道》,而老婆田蕊妮都好多嘢做,自從喺13同15年攞過兩次視后之後,就冇停過拍劇,所以不時都會傳出係由田蕊妮擔起頭家。係杜汶澤擔起頭定田蕊妮就真係唔清楚,不過阿澤買嘢呢……相信田蕊妮就會有啲意見喇,因為早前田蕊妮就喺facebook貼咗一部相機嘅相,內容就話:「啱啱喺屋企行過,見到一部好生面囗嘅相機,然後與屋企另一位成員展開對話!我:『咦,你又買咗新相機呀?』杜:『um……吓…哦…』我:『你又買咗新相機?』杜:『吓……哦……』我:『喂,問你呀,係咪買咗新相機呀?』杜:『aiya……我哋去旅行吖嘛!』然後悄悄地飄走!!!」之後田蕊妮再貼多張相,就係杜汶澤做緊嘢嘅相,田蕊妮就話:「好,見你做緊嘢,又有其他人喺度,相機單嘢暫時擺低,繼續努力剪片!」之後喺facebook都唔見佢再提相機嘅事。而佢哋兩公婆之後就去到日本旅行,田蕊妮就貼咗張滑雪嘅相,話:「滑呀⋯⋯滑呀⋯⋯」但之後杜汶澤就貼咗一張相,不過就轉咗黑白,仲話:「我老婆一學就識,我條氣好唔順,我好灰。」雖然講到好灰,但都係佢哋兩公婆嘅情趣嚟,邊個擔起頭家其實又唔係好重要嘅,重要嘅係夫妻相處得開心就好啦。




來源: http://hk.apple.nextmedia.com/entertainment/art/20170218/19932410
PermaLink: https://articles.zkiz.com/?id=326891

Next Page

ZKIZ Archives @ 2019