中環在線：花旗董事會擬炒主席 李華華
2008-11-14 AppleDaily
美 國次按搞到唔少銀行風聲鶴唳，頂得住唔使清盤嘅銀行，裁員減薪少不免，咪以為淨係低層打工仔飯碗難保，連高層都分分鐘要起身！花旗主席比肖夫（Win Bischoff）上年尾先坐上主席位，家陣放假去中東旅行期間，花旗董事會似乎想趁機換人。據《華爾街日報》講，花旗董事局覺得比肖夫坐鎮倫敦，山長水 遠，怕佢唔能夠『目及』實總行呢邊，咁講法，即係有人認為佢唔稱職啫。報道引述消息人士話，有董事考慮撤換主席，熱門人選係董事局成員之一嘅時代華納主席 Richard Parsons。Parsons來頭都唔嘢小，係候任美國總統奧巴馬嘅經濟顧問！
凳未坐暖又話換人
查實，花旗前主席兼行政總裁普林斯，亦因為大花筒令股東不滿，後嚟仲為次按損失而要落台，估唔到頂替佢嘅比肖夫凳未坐暖，就可能要面對同一命運。睇嚟呢個時勢，花旗主席呢個位唔易坐。