📖 ZKIZ Archives

業績簡評 - 龍記集團 (0255.HK) PARTIPRAL 派得好

http://partipral-hk.blogspot.com/2012/03/0255hk.html


龍記下半年營業額同比下跌3.3%, 環比微升1.7%, 全年計收入比去年倒退約3%. 倒退原因除左包括上半年已提及過既日本地震之外, 最主要都係因為受歐美債務問題困擾, 以致中國出口業務受到拖累; 加上整體市場訂單減少, 同業競爭比以往更激烈, 亦打撃整體產品售價, 拉低營收.

上半年其中一項頗影響公司利潤既材料成本下半年已見大幅回落, 雖然對營業額比例仍比去年高, 但其實只係2010年特別好景而已. 再早幾年材料成本佔營業額比例平均講緊既係48%以上, 近幾期業績顯示目前管理層響成本監控方面其實已比以往做得好.

反而僱員支出會係比較難解決既問題, 上半年做得好, 但下半年又已經打回原形. 雖然今年總員工人數進一步跌至新低5,700人, 手起刀落, 斬得好快, 但由於近年整體工人工資提升得仲快, 故此人力成本仍然繼續上升. 好幾年前龍記係請過萬人既大工廠, 到今時今日員工人數只剩一半, 但對比當年, 實際支出其實分別不大. 精簡架構同生產自動化仍然繼續會係大趨勢, 但斬人始終會有極限, 工資持續上漲, 會係一個隱憂.

今年固定資產大升, 原因係浙江有新廠落成; 存貨微升, 問題不大, 應收賬應付賑一跌一升, 今期現金流應該有5億左右, 手頭淨現金4億, 財政方面問題不大.

值得一提既係管理層預期杭州新廠今年第3季可以初步運作, 跟之前一直預告既步伐一致. 加強華東等地區市佔率, 對提升整體營業額應該有一定幫助. 前景展望, 管理層希望能夠借杭州新廠迎合日益壯大既中國內銷市場, 開發節能環保, 新能源汽車等產業以及進一步向大型汽配市場發展. 若然產量能一如預期提升5成並完全盡用的話, 營業額有機會提升至35億以上, 但講緊既已經係2013年既事.

2011年扣除其他收入同物業公平值變動後, 核心盈利應該大概係2.28億 (每股盈利約$0.36); 對比2010年既3.08億倒退大約26%. 以現時股價$3.97 (市值25億)計, 往績P/E近11倍; 股息率約6.5%, 由於前景繼續比較難判, 估值傾向偏貴少少. 新廠最快都要2013年先能夠完全投產, 今年龍記應該難有大驚喜. 若然以歷史估值作參考, 市盈率高低區間應該係5-11倍之間, 而目前正正處區間頂部. 比較合理既做法, 可能係先沽出, 日後候低再吸.
PermaLink: https://articles.zkiz.com/?id=32146
Next Page
ZKIZ Archives @ 2019