【不理阿莫】2016狂想 點解CY放棄連任？
1 :
GS(14)@2016-12-31 10:18:07以前，你大可醉生夢死，酒醒後又一day，係same shit different day。踏入2016，原來已經唔同玩法，你不找荒謬，荒謬找着你。Hong Kong is dying，只要考過TSA的小學雞，也會告訴你grammar錯晒，香港唔係慢慢死，係一死就死。2016年頭開得冇得再差，銅鑼灣書店事件給予港人一個清晰啟示，你們要的不是一帶一路施政報告，而是一份走投無路死亡報告。想找點樂子？CY放棄連任總算是食屎後有羹砂糖暖胃。你問為何顏面厚如CY者，處心積慮鋪連任，卻在關鍵一刻退縮？是六合彩早有預兆，知天命不可違？是怕輸給盲返香港的掃巴頭？是愛上了打官司？是怕被《成報》日日數臭？還是真的如他所說，要做個顧家好男人？公道講，CY顧家毋庸置疑。這邊廂，細女賴低件行李，不惜以身犯險特事特辦，「叫我梁特首」唔係人人說得出。那邊廂，老婆籲大家劏房種菜自給自足太離地麼，便搞gag建議lunch time食飽飽暢飲吧，同樣是騰出空間罷了。實情係，CY放棄連任全因「粒粒皆辛苦」，除非唔係。先搞清楚，這「粒粒」是那「粒粒」。是哭不出的眼淚？是雨夾小冰丸？還是譚耀宗粒瘜肉呢？我認為魚旦最辛苦最無辜，好地地一粒魚蛋，無啦啦叫魚丸子。好地地新年街邊擺賣，無啦啦被食環趕絕。魚蛋要起革命啦，以後大年初一不用偷雞燒炮杖，大街大巷鳴兩槍先夠霸氣夠驚喜。驚喜？這年港人消化透了。出本書，誰料會被消失？誰料會被屈坐洗頭艇？兼仲要對人講愛國？選議員，誰料要簽乜乜確認書，簽完都被剝奪資格，有資格都被人跟蹤，變相被迫退選？選到又點，誰料會受死亡威嚇？誰料到會被DQ？最終搞到人大釋法？ 一國兩制五十年不變？完了吧，如無意外。世間沒有甚麼是永恒，小方Stephy要分手，Page One要執笠，Virtual Zone要收檔，強如亞視都有熄機一日。唯一永恒，叫周永恒，爛gag嚟，答案係地鐵可加不可減機制。霸王硬上弓，地鐵只是小兒科。議員可以粗暴剪布，「鑑」粗通過高鐵超支撥款；報館可以堆砌理由，粗暴解僱執總；化妝品牌可以粗暴封殺歌手；惡霸可以粗暴傾倒泥頭；地產商可以粗暴收地。政府想起故宮博物館？不用問市民一句，保密工夫做得好，滴水不漏。想起公屋咩？Sorry，要先溫柔摸底磨合，影響風水就唔好啦。有說官商鄉黑，黑色儼如今年主要色調，陰霾籠罩全港。中環站內有短暫停電，中環站外有黑衣示威，是捍衛法治的垂死掙扎。見過鬼仲唔怕黑咩，楊焗腸最引以為傲政績，就肯定見過Steve Jobs吧。今年的風風浪浪，港人見過，港人真係見過。寒流？照上山頂。黑雨？照睇報紙。打風？照捉精靈。地震？震得過廉署？事隔數月，一切依舊，人面全非。人生有幾多個十年，電影又有幾多套《十年》？都係爾冬陞講得好，最需要恐懼就係恐懼本身。你真係要佩服史Sir，連偲嫣都頂得順，還有甚麼值得好驚？炒燶iPhone？到先達開拖囉！新屋馬桶坐唔到？KFC解決囉！沒地方敦倫？O-camp發洩囉！講笑啫，做人應如曹星如，打一場硬仗打一場硬仗，轉眼就20連勝。一係學嘉琦BB，一日拉四次頭馬，巾幗不讓鬚眉。再唔係好似「牛丸」，一係唔做教練，一做就亞洲Number One！話說回頭，CY說的「粒粒」是口誤，正確是「嬲嬲」，facebook的「嬲嬲」呀。嬲嬲，係立法會主席無能；嬲嬲，係學童自殺冇人理；嬲嬲，係凶徒越來越狼死；嬲嬲，係伊院隱瞞醫療事故；嬲嬲，係公屋呎價都過萬呀癡線。行政、教育、治安、醫療、房屋，全部嬲嬲，CY還有臉做特首？叠埋心水返鄉下釣魚好嘛，唔係爛gag。完撰文：杜秋棠＠抽水站
https://www.fb.com/freakingwestlook
來源:
http://hk.apple.nextmedia.com/entertainment/art/20161231/19882353