2011-3-6 AD
大賓架 M為銀行宣佈 2011年業績會時，宣佈退休，因事先毫無徵兆，不少人聞訊愕然，猜猜度度，認為有內幕。呢日與賓架 M碰頭，賓架 M都唔知幾輕鬆，笑容滿面，左丁山問佢：「為銀行業績開心還是為即將退休開心？」賓架 M咭咭笑咁講：「同時為呢兩件事而開心得唔得啫？」
得到極 啦，做銀行 37年，人在高峯時退休，快慰何如，左丁山恨都恨唔到，賓架 M話：「嗱，為避免各方猜想，特別公開講，我到今年六月就滿六十歲，係集團嘅退休年齡，你地唔好胡亂猜想甚麼內幕。」講得啱吖，但在五月十一號以後接替賓 架 M嘅，係另一位女強人賓架 R，報紙標題：「 59歲換 59歲」，點解咁呀？賓架 M話明：「講個小秘密你聽，我同 R自少相識，我倆係聖心同班同學嚟㗎，佢又經驗豐富，由佢接班，十分理想，又難得佢肯接棒呢！」
哦，聖心書院真巴閉，本地大銀行連續兩任總裁都係 聖心校友，加埋陳方安生，三個足以做聖心生招牌，左丁山識得賓架 R之時，佢在中國部工作，不少與佢同年之「中國業務專家」已紛紛轉行或者退休，有佢咁嘅資歷嘅，熟悉中國業務嘅賓架，少之又少，數唔出三幾個，其中一個就 係賓架 D，又是女強人，當年在中國部與賓架 R做過同事，現長駐上海做中國區行長，年紀與賓架 M，賓架 R相若，點解佢唔退休呢？據悉係賓架 M知人善用，早已將賓架 D服務年期延至六十歲後，啱啦，將來呢間銀行嘅 CEO係中國專家，與賓架 D合作拓展中國業務，有雙劍合璧之效。
賓架 M與左丁山講完笑，即晚到快活谷馬場，希望可以拉頭馬，但隻馬只能快放跑到個亞軍，輸 W，條 Q一定中！賓架 M嘅良人係標準馬迷，與左丁山唔駛約會，每個星期都會在馬場碰頭，以後賓架 M咁得閒，唔知會唔會做跟得夫人與老公在馬場齊齊亮相呢？以佢嘅條件，過冷河後，必定有大把人向佢招手，如重出江湖，左丁山一啲都唔奇怪，不過要奉勸一 句：要嘆夠先呀！