【add】紅人主場：鄧麗欣忘記失戀
1 :
GS(14)@2016-11-24 07:39:42Self Portrait連身裙（Lane Crawford）
三字頭對於不少女生來說，都意味着成長階段的一個突破關口。33歲鄧麗欣（Stephy）在下月上映的新戲《失戀日》中，飾演一名貼地的三字頭女生，面對愛情、事業和生活都需要種種抉擇；現實中的Stephy，同樣不愛被框框局限生活，追尋自我改變，「你先要了解自己，然後再一步步去做，我而家正正係想跳出框框嘅時候。」統籌：林妙萍造型、撰文：陳蔚渝攝影：郭賢興化妝：Cyrus Lee 髮型：Vince Pang由《獨家試愛》、《十分愛》、《我的最愛》、《紀念日》，至新片《失戀日》，Stephy再次為葉念琛導演的電影擔當女主角，已經演過阿寶無數次的她，今次同樣是飾演阿寶，可以說是與阿寶一同成長，這個系列由單身、熱戀、紀念到分開，完全是度身訂做的一個戀愛寫照，「導演希望我成為呢一群女性嘅代言人，正正我都係呢一個年紀，我覺得自己呢幾年都有一啲轉變，可能想法或者將來，希望大家可以有共鳴。」
Emilio Pucci條子上衣Isabel Marant紅色短裙
Red Valentino針織蕾絲裙
落足力演好戲
新片與金燕玲、鮑起靜等前輩級演員合作，令到Stephy完全不敢鬆懈，「我好記得第一日同金燕玲姐姐對戲嘅時候，佢話『我唔會試戲，因為我係100%投入落去』，就算試戲，佢都會喊咗出嚟，我覺得好犀利，令我一刻都唔夠膽放鬆，要比平日更認真更落力，出到嚟幾場戲都非常好睇，我覺得佢可以激發到我嘅潛能出嚟。」《失戀日》之後，Stephy接拍了另一部電影做打女，希望可以呈現不同面貌給觀眾，為準備角色，她亦下足苦功，「電影背景係空手道，所以早幾個月就要去訓練，要做好多體能，因為有啲場面唔可以用替身，導演唔想咁多分鏡，希望可以見到多啲我去打嘅場面，所以要落足工夫，而唔係得個樣。」近年Stephy明顯將主力放在電影方面，問到可會再推出新歌，「講真冇諗過呢方面，可能大家會有啲失望，唔係唔鍾意唱歌，但係如果需要抉擇，我會捨棄唱歌先，會選擇專注拍戲，呢幾年有諗過，如果自己鍾意一樣嘢，想專注落去做好啲。」
■好姊妹Kary和Miki都已經結婚做幸福人妻。
《失戀日》劇照
單身認識自己
今年Stephy與方力申結束了十年情，雖然旁人覺得可惜，不過Stephy就覺得難得單身，就更應該去認識自己，「呢個都係一個人生幾重要嘅時刻，你點樣喺呢個時候發掘多啲自己，因為我覺得好多時拍緊拖都係盲目，好多嘢可能淨係見到對方，未必見到自己，所以呢段時間反而可以睇清楚更多自己，同埋做多啲以前做唔到嘅嘢。」Stephy又認為失意，又或者一個人的獨處時間，正正是尋找靈感的好機會，「一啲新想法，新思維都可能會係呢段時間出現，所以我要好好享受呢段時間。」雖然身邊的好姊妹吳雨霏和楊愛瑾都已經結婚做幸福人妻，不過Stephy認為婚姻是一件自然的事，所以不會強求，「我好相信緣份，所以唔會覺得人有我就要有，又唔係小朋友，我會戥佢哋開心，自己會享受自己嘅路。」
■Stephy自組排球隊Loey，身為班主的她帶領球隊多次出賽。
自組球隊圓夢
一向熱愛打排球的Stephy，為重拾夢想自組球隊Loey，身為隊長的她花費不少心機和時間，「我除咗係班主都係球員，所以都要畀時間練習。」隊員全部都要兼顧返工返學，所以Stephy認為在香港做球員一點也不容易，「大家有同一個信念，所以都盡量抽時間去做呢件事，其實定期一星期練三次波，但大家都好理解我。隊員來自五湖四海，其實都係一種緣份，上年比賽贏咗升咗班，其實都經歷咗好多，來來回回離開嘅隊員都有幾十個，所以剩低嘅呢一班有心打上去都唔簡單。」
來源:
http://hk.apple.nextmedia.com/entertainment/art/20161124/19843468