ZKIZ Archives

冒牌業主賣樓 左丁山

2012-3-2  AD

唔睇樓就買樓，左丁山唔敢制，亦因此失去幾個發財搵錢機會。香港樓市有起有跌，十年之內，幾乎肯定可以見到一個「上升下降上升」循環，二十世紀八十年代、 九十年代、二十一世紀頭十年，莫不如此。昔年樓價大跌，賓架黎揸住不少中西半山銀主盤，叫左丁山去 bid番一兩間，因為無法子搵到買家也，偏偏左丁山係要去睇過先，睇完就覺得幾間屋各有缺點，例如塞車、斜坡太斜、陳舊有臭味諸如此類。於是間間都唔買。 事隔十幾年後。呢啲樓間間升值五至十倍，俾賓架黎笑到面黃：「抵你唔發達！」左丁山唯有苦笑，只好做阿Ｑ話自己買樓唔會俾地產中介人呃到，起碼清楚確定誰 是業主。
買賣樓宇都會呃人嘅噃。一九九六年間，一間位於羅便臣道嘅「豪宅」，由梁振英測量師行經手安排出售，售價一億零五百萬元，成交後見報，李 姓業主為大家族（康年銀行）之後，睇到新聞，吃了一驚，自己從未委託授權任何人出售家族祖業，點解會賣咗呢，於是立即查究報警，買家不是炒家或散戶，而是 企業集團──莊士機構國際有限公司屬下一間公司，呢間公司先後兩次以支票支付一共三千一百六十五萬元俾律師樓做訂金，律師樓收到「業主」指示將支票交俾兩 名不同被告，被告立即提取現金。第一被告在九六年被捕，判監三年半，第二被告在 2006年被捕，李姓業主因及時報警，得以保護祖業，莊士機構就唔好彩咯，被騙去三千一百餘萬元。
咁大間公司都會俾人呃，誤信「假業主」，簽訂臨 時買賣合約，交付訂金，律師樓與樓盤放售代理梁振英測量師行有無被騙呀？呢個冒認做業主賣樓案，九六年曾引起行內人士議論紛紛，質疑有關專業人士究竟有冇 做過「盡職審查」，最起碼係確定「業主」的真實性，而唔係隨便有人行上梁振英測量師行話聲賣豪宅，自己係業主，梁振英測量師行就信以為真，代為放售，並且 主動發傳真向莊士放盤。一九九六年嘅梁振英先生未入政壇，應該冇 2002年做西九設計評審員之時咁忙碌，唔通當時已經因為公司「太大」，佢對單生意又係「全不知情」？