ZKIZ Archives


似僆妹遭當街罵梁小冰還拖鬧大媽

1 : GS(14)@2016-11-16 05:10:13

■小冰上周素顏陪老公行山時十分青春,難怪經常被當作僆妹。微博圖片



現年46歲的梁小冰跟老公陳嘉輝育有9歲兒子,外表完全不似師奶的她,前日化身粉紅lady開心出席友人的公司喬遷之喜,怎知到晚上,她卻怒火沖天撰文爆被大媽當僆妹鬧阻過馬路,兩人在街上舌戰。


最憎人霸道

在港視劇《導火新聞線》演巴辣「皇阿媽」的小冰,原來現實中都不會任人欺負,她前晚在微博寫道:「今晚喺紅綠燈等過馬路嘅時候,遇到個阿嬸企喺我後面嫌我僆妹掛住食魚蛋擋住佢過馬路,即刻用討厭我的眼神睥我一眼,然後繞過我前面去衝紅燈過馬路,我正想提醒佢係紅燈唔好過,佢過完之後即刻轉頭鬧我食嘢阻住晒佢行。」小冰越寫越扯火:「佢以為我真係僆妺唔敢還口,激到我無明火丈三千起,追咗佢成條街大大聲教訓番佢……我最憎啲惡女人橫行霸道,唔好以為我似僆妹就隨便恰人。」



【勁睥】■梁小冰食魚蛋等過馬路,後面心急的大媽嫌她擋路勁睥。設計圖片

【衝燈】■大媽以為小冰是僆妹,過到一半毫無忌憚轉頭鬧小冰。

【速撇】■小冰即還以顏色,追着大媽鬧到她收聲。

昨日記者致電小冰了解,她透過短訊回覆:「這是日常生活平常師奶遇到的小事,諗住講出嚟等大家安慰一下我盛怒的心。我都係有血有肉的普通人,同大家一樣行街、買餸、逼地鐵,遇到很多不公不平不正不義不滿的人和事,都會出聲和反抗,以免縱容更多的惡人打橫行欺負弱者,更不會因為自己係公眾人物怕事而不敢反抗,當然大多時候我會選擇忍耐以免激親自己。」



■梁小冰(左二)前日開心出席友人公司喬遷之喜,怎知晚上即遇上不快事。微博圖片

老公惡十倍

對於被當僆妹,小冰笑說:「昨晚完全冇化妝,所以望落似囉,成日去街市買餸,啲阿叔阿嬸話妹妹想買乜呀?其實我生完仔後,呢十年老咗好多喇,佢哋冇望真啫!」問到老公的反應?小冰說:「老公呵番喇,仲話如果喺我身邊等佢去鬧,唔使我咁激氣,惡起上嚟佢比我惡十倍,試過BB出世頭一年,住喺樓下個男人日日冇嘢做喺屋企揼釘、鑽牆、整水喉,每次嚇到我個仔驚醒大喊,我懇請停止佢唔聽,仲自私到話之我死,結果我老公用兩秒衝落樓下,用雷公咁大聲鬧爆呢個男人變態自私,從此老公係我英雄!我老公一係唔出聲,當佢出聲你一定後悔!」採訪:皓騫




來源: http://hk.apple.nextmedia.com/entertainment/art/20161114/19832617
PermaLink: https://articles.zkiz.com/?id=315656

Next Page

ZKIZ Archives @ 2019