一句㷫網民巫啟賢稱香港樂壇放棄側田
1 :
GS(14)@2016-10-27 06:02:40大陸節目《蒙面唱將猜猜猜》（即《蒙面歌王》第二季）真係冇得輸，為唔少歌手提供平台唱人哋嘅歌，就好似李克勤、楊丞琳同最近嘅側田咁，都成為網上熱話。不過大家都知，識睇嘅一定係睇評判，尤其係巫啟賢，曾經喺香港發展嘅佢竟然認唔出李克勤把招牌靚聲。今次輪到側田出招。鏡頭前化名「童話裡不是騙人」以「小王子look」上《蒙面歌王》嘅側田，節目中坦然自剖:「因為小王子是完美的，但是，側田並不完美！」側田喺10月23日嗰集公開身份，評審之一巫啟賢就謂：「其實你已經走出了香港地區，來到這麼廣闊的一個天地，我覺得你再拘泥以前的形象的話，你太小看你自己了。」呢番話真係完全乎合國情！不過咁都未夠，巫啟賢仲話：「這幾年的時間，我覺得是香港的樂壇離棄了你，但現在你重新站在一個這麼好的舞台上，也許是你的人生的另一個巔峰的音樂生涯的開始。」嘩！聽到人熱血沸騰！不過就沸騰到辣㷫網民，有唔少網民仲留言鬧爆巫啟賢，話香港人冇離棄側田！側田接受《蘋果》電話訪問表示：「我呢幾個禮拜都有留意social media，見到好多網民支持我嘅說話，我想同佢哋講，好多謝佢哋，咁多年都咁錫我，我都係好錫佢哋，我係冇忘記過。」側田話因為節目要保持神秘感，所以之前唔講得係自己參賽：「呢個禮拜喺街好多人問我，感覺好warm，好開心，多謝！12月新歌出嚟，希望大家留意啦。」
來源:
http://hk.apple.nextmedia.com/entertainment/art/20161027/19813399