澳門騷耍大牌 趕司儀莊思敏落台金宇彬被數五宗罪
1 :
GS(14)@2016-10-24 06:12:18■金宇彬前晚在澳門舉行見面會，被力數五宗罪。 網上圖片
憑人氣韓劇《繼承者們》彈起的金宇彬，前晚在澳門金光綜藝館舉行粉絲見面會，金宇彬方面因入座率偏低而扭計不願出場。事後有知情人士爆seed，力數金宇彬方面耍大牌、不合作、累死主辦商、扔掉粉絲禮物及趕司儀莊思敏落台五宗罪。金宇彬今次舉行的澳門騷認真多阻滯，先因為颱風「海馬」來襲，令他延遲24小時至前日才抵達澳門，之後晚上的見面會又被爆入座率只得三成。其實今次見面會籌備很匆忙，上周一才公開發售，僅得數日時間谷飛，票房自然差強人意。見面會原定前日傍晚6時30分開騷，據知金宇彬方面要坐夠八成觀眾先出場，最後有人施壓，金宇彬才肯於7時左右出場。加上金宇彬整個團隊都勁不合作，要求奇怪及無理，更拒絕在現場與粉絲玩新遊戲，堅持翻炒兩年前的遊戲。據知情人士表示由於金宇彬方面一直遲遲不讓主辦開售門票，最終只賣得一成飛，令有關人士要周圍派飛。而金宇彬前日抵澳門時獲近百粉絲接機，現場有收下粉絲的禮物，但據悉他未落車就將禮物扔掉，而前晚完騷後又即撲返韓國，但笑容明顯牽強。
■莊思敏（右）前晚擔任見面會的司儀，尾段時更發生被趕下台事件。
■前晚完騷後金宇彬即火速走人，笑得牽強。
「都有hard feeling」
至於前晚擔任見面會司儀的莊思敏昨在電話中直認見面會中間曾出現誤會，但詳情她就不知，亦表示事前沒有與金宇彬做綵排。對於有現場觀眾發現她在結尾時被邀請落台，她直認有此事，但強調是小誤會。問到會否感覺被人趕落台時，莊思敏說：「其實我都同好多韓國人合作，佢哋嘅工作態度比較強硬，咁當然喺言語不通情況下，佢哋就不停咁推我，我都會有hard feeling。之後我自己諗番，佢哋真係心急，同我溝通唔到，用身體語言話畀我知落台嘞落台嘞。」她表示當時被一位韓國人拉落台，落台後都有禮貌鞠躬，但事件不會令她拒絕同金宇彬再合作。採訪：施洛冰
來源:
http://hk.apple.nextmedia.com/entertainment/art/20161024/19810032