2012-2-2 AD
今年一月份全球股市大升，美國投資專家話以「一月效應」預測全年市道，準確率有八成以上，如果係咁，美國股市杜指、納指、標普五百全部可能上升，帶挈埋亞洲股市，包括香港在內。
預 測如此，中間有無起伏呢？有啩，就係老生常談嘅歐債危機，危機由希臘開始，蔓延至葡萄牙、西班牙、意大利，最後出動到德國、法國、 IMF全力救火，局勢慢慢穩定，到現在，根本就係德國話晒事，德國總理默克爾夫人係全球最有權勢人物，佢嘅決定可以影響歐洲債市以至全球股市，奧巴馬唔係 嗰皮。
在德國指揮棒下，希臘與 IMF強迫希臘債券持有人「自願性」剃頭，希臘以新債券償還舊債券，但新債券面值只係舊債三成左右，而且利率低至 3.6厘。點解要「自願性交換債券」呢？因為如果非自願，希臘就會被視為正式賴債（ default），似足 2002年嘅阿根廷，遭全球投資者杯葛，至今難以在世界市場賣債集資。邊度會有人「自願性」剃頭（ haircut）㗎？有人揸枝槍指住債權人個頭咪會囉。國家政權惡起來，與強盜打劫差不多，當初買入希債之債券基金、對冲基金，貪圖高息，以為國家政府要 臉，唔會賴債，點知貪字變個貧，希臘在德國默許下，事後改變發債法例條文，追認生效日期至發債之前，等於對方按合約買入貨品之後，立即修改合約條款，仲宣 佈舊約無效，惡成咁，任何投資投機人士都中晒招。
但原來歐盟法庭確認咗產權（ property rights）就是人權（ human rights），一啲對冲基金正構思到歐洲人權法庭控告希臘修改發債合約係違反人權，要求賠償。呢條橋行唔行得通，無人敢肯定，但如果真係告上人權法庭， 希臘就幾麻煩，如債務不能解決嘅話，世界股市會受影響。講番香港，有港大教授，叫何東花園主人唔好「賺到盡」，視他人之產權（包含擁有權、使用權，及處理 權，前港大教授張五常講嘅）如無物，可嘆也。香港有不少人對環保、文化、人權各方面，言必歐洲、歐盟，奉歐為師，但一講到產權，就露出中國父母官嘅面目， 更加可嘆。