現金公司變招策略 高仁
1 :
GS(14)@2016-04-20 19:06:572016-04-18 HJ
各位「巴打」如果有錢有「米」，「package」（整個組合）夠好，就會被封為「男神」；相反，如果上市公司的錢多過「籠」（冇錯，是錢多過「籠」！），就可能會被視為現金資產公司（簡稱現金公司，cash company），隨時要「拉閘」停牌。
最近，港交所（00388）為打擊「啤殼」借殼上市行為，就現金公司定義發出新指引，以現金佔資產逾50%為定界。「高仁指點」與「豬朋狗友」討論後相信，投資者可能會有以下的變招策略：
?只注入佔資產49%的現金；
?尋找其他資產值大或業務相近的殼股。
定義劃界更易買殼
在披露對話實錄之前，請各位「巴打」與「絲打」重溫人物背景，簡介如下：
戴孤劃──又稱為「戴Sir」，《信報》〈蠱壇辨虛實〉專欄作家、上市公司大股東，經常欺壓小股東（高仁按：查實已經幫戴Sir在本欄賣了不少廣告，應該收返戴Sir一點廣告費）；
程更計──本地證券行經紀兼財務顧問，除了招呼散戶之外，亦向上市公司出謀獻計。
戴孤劃：咦！阿程，你真係聽高仁嘅意見，去買咗套新西裝？
程更計：高仁袋錢落我袋喎，梗係嗱嗱聲去做。高仁，請你食一隻燒鵝左髀。
高 仁：多謝晒。
程更計：大家有冇留意到，內地土豪之前集體「團購」收購本港上市公司，擬注入大量現金再借殼上市，果幾單刁都停咗落嚟？
戴孤劃：（突然轉channel改用普通話，高仁按：唉！戴Sir又賣廣告）幹嗎？
高 仁：三色台經典電視劇《飛越十八層》，主題曲中一句歌詞「難為正邪定分界」，相信就係原因所在。
程更計：高仁，你係咪講緊港交所「發功」，出咗新指引為現金公司劃界呢？
高 仁：Bingo。按照《上市規則》【小檔案】，如果上市公司全部或大部分資產係現金或短期證券，一般會被視為cash company而不適合上市，港交所可以將其停牌。但對於「全部或大部分」嘅意思，港交所一直都冇清晰界定，「唉賓」以往要逐單刁去試。
現金不逾半即過關
戴孤劃：內地土豪以大折讓價格購入股份，以向上市公司注入大量現金，就係咁死喺港交所嘅新指引之上？
程更計：係呀！最新指引列明，如果集資活動完成後，上市公司資產少於一半係現金，就唔會被視為「全部或大部分」資產係現金；相反，資產多於一半係現金，就會被視為現金公司。
高 仁：港交所可能覺得內地土豪注入大量現金，從而取得上市公司控制權，之後將大量資金去發展新業務【表】，但新業務根本不符合新上市申請嘅規定。換言之，內地土豪係變相將不適合上市嘅新業務借殼上市。
戴孤劃：咁「唉賓」有冇應對方法？
程更計：港交所咁做係會增加借殼上市嘅難度，但掉番轉頭嚟睇，而家白紙黑字為現金公司定界，內地土豪只要注入49%現金入公司，咁咪符合指引嘅規定囉。
高 仁：點止呀！內地土豪日後買殼可能更加奄尖，專門揀一啲有重大資產嘅公司，或者業務相近嘅公司。如果適合嘅乾乾淨淨靚殼供應少，有可能會刺激殼價進一步上升。
戴孤劃：嘩！咁你哋做金融業咪好發？
程更計：所以，我咪買定套good fit西裝，準備隨時同內地土豪斟刁買殼。
?
小檔案──「現金資產公司」定義
港交所《主板上市規則》第14章82節，對「現金資產公司」定義如下：
不論何種原因（包括因為完成項須予公布的交易或關連交易後出現的即時結果），如上市發行人（第21章所界定的「投資公司」除外）全部或大部分的資產為現金或短期證券，則該上市發行人不會被視為適合上市，而本交易所會將其停牌。
「短期證券」指年期少於一年的證券，如債券或多種長短期票據。
本欄逢周一刊出
歡迎交流上市公司的財技個案及招數，請電郵至
[email protected]。
?
#高仁 #財經拆局 #財圈識真假 - 現金公司變招策略