58年老字號 忠心員工致「悼辭」效力54年老臣子：亞視係我家
1 :
GS(14)@2016-03-05 01:15:31■為亞視效力逾半世紀的節目部主任Phillip直言仍然愛亞視。沈健程攝
【亞視停播】【本報訊】由「亞視永恒」到「亞視不靈」，曾經千帆並舉的58年老字號，如今千帆過盡，乾塘而死。在彌留的日子裏，當網民千般奚落恥笑，他們仍默默給這家搶救無望的破產公司善終。在亞視（圖）「拔喉」前夕，《蘋果》找來幾位留守到最後的員工，為他們又愛又恨的東家作個「悼辭」。
亞視今日終於要熄燈閂門，最不捨得的要數為亞視效力逾半世紀的老員工程啟光（Phillip），現年73歲的他任節目部高級節目執行主任，1961年僅19歲的Phillip在英國友人介紹下加入麗的電視，由麗的映聲做到亞視，在節目部工作54年，前年更從亞視投資者王征手上接過「終身榮譽員工」獎狀。
Phillip熱愛公司，經歷多次改朝換代，他都風雨不改緊守崗位。Phillip昨日在大埔接受《蘋果》專訪，當時法庭已宣佈無法阻止德勤遣散及「熄大掣」的行動，Phillip說：「我到尾都唔會啟動（僱傭條例）10A，如果德勤今日畀信我，我一定會接。一日未離開，我都會遵守同公司嘅合約精神。」
留守到最後一刻
面對亞視執笠，Phillip表示平常心面對，「呢件事蔓延咗好耐，我都平常心，有晒心理準備，係事實要接受，我會留守到最後決定」。昨晚亞視臨時清盤人德勤召開記者會，決定今日遣散所有員工，Phillip表明會繼續返亞視大埔總台留守到最後一刻。王征被指拖欠薪金，Phillip卻不怨恨：「我睇責任歸咎邊個，留番巿民判斷。每個投資者入嚟都想興旺亞視，到頭來唔得，佢都投放咗資金，唔係白手行入嚟。王征先生喺亞視6年投放咗23億，同埋佢冇一分錢銀行貸款，而家申請攞番18億，做電視真係燒銀紙。」即使面對亞視最終提早結業，Phillip直言仍然愛亞視：「每個朝代都咁鍾意，唔鍾意就唔會做咁耐，對每個投資者都冇怨言，亞視係我家，我喺嗰度成長。人嘅青春一定會消逝，但奉獻咗係有回報，佢都一路養住我，養大我，我好感恩。佢熄燈一定會感觸，人之常情。」Phillip仍關心亞視執笠後的手尾，「公司可能內部都要有好多問題要處理，我係樂意協助」。■記者王麗春
來源:
http://hk.apple.nextmedia.com/news/art/20160304/19516001