📖 ZKIZ Archives

長貧難顧 左丁山

2012-2-8  AD

講扶貧，首先要記得一句俗語：長貧難顧，此話甚有現實意 義。假設你有錢，有一位窮親戚，每月問你借錢，你借咗一年之後，你好好人呀，但總不免覺得難以長期如此，於是會勸佢搵一份工，幫佢搵一份工，甚至仲好人 啲，借錢俾佢去參加職業技能課程，而所謂借錢，係預咗佢唔會還嘅，只係當作已出使費。
香港有冇咁好心之人，或者有嘅，左丁山唔識。將個人故事擴大 七百萬倍，成為社會事件，政府如長年累月為大人大姐，健康正常青壯年人士提供綜援，支出肯定不少，在人口老化嘅情況下，政府總有一日難以負擔，一早提供高 福利，高退休保障嘅部份歐洲國家，例如希臘，已發覺大有問題。
扶貧嘅最王道方法，就係 㩒低失業率！綜援嘅最大原意係為老弱傷殘人士提供安全網，並非失業救濟金。創造就業，令到精壯及經驗豐富嘅人口（二十至六十四歲）達至充份就業，並且盡量 提升薪酬，香港其實目前已做到呢一點，數字昨日講過，不再提。香港工人薪酬與鄰近地區相比較，其實非常好，一般高過新加坡幾多吓。但點解有咁多有工做之人 覺得自己窮呢？睇嚟主要原因係生活費用高昂，最大筆生活費就係租金或者供樓，尤其是住在劏房嘅人士，更加覺得自己窮。自內地遷移至香港（據每日一百五十名 單程證配額來港者，不少屬於貧窮類別，香港基本上每日輸入貧窮，但此配額為家庭團聚而設，屬基本人權，難以反對）。
根據林奮強「黃金五十」之研 究，香港通脹之最大原因乃高昂租金，舖租與寫字樓租金已超過 1997，住宅租金仍未升回 97水平。對症下藥，特區政府必須大力提供商業用地，建造寫字樓，商業街與商場，以減低租金及通脹，令到在職人士減低「在職貧窮」嘅感覺，一味派糖、派 錢，年年給予小恩小惠嘅話，對根治通脹及貧窮，根本無甚幫助。 2012/13年嘅財政預算案沿用派糖方法，對解決通脹與治貧，效用不會彰顯。明年有新人上場，希望有新思維啦，但如果新人受到壓力，向工會派議員、政黨 低頭，大派特派嘅話，大家要醒定啲，為自己着想多啲嘞。


PermaLink: https://articles.zkiz.com/?id=31186
Next Page
ZKIZ Archives @ 2019