ZKIZ Archives


【專題籽】收工開網台 講Game有錢賺

1 : GS(14)@2016-01-24 17:09:41

由一班打工仔客串做主持講打機的網台JapHK,逢周一至五晚上八時起,會在YouTube直播節目,不經不覺已運作了兩年多。



【專題籽:潮流乜乜乜】打工仔捱過一日工作辛勞,放工後可以有乜細藝?有班打機發燒友,一放工就會聚集到一個工廈單位,唔係排隊買嘢,而係客串做網台節目主持,分享打機心得,周一至五風雨不改,直至凌晨一時。公餘時間開網台已非新鮮事,但這班拒稱YouTuber的麻甩打機友越玩越專業,開台兩年多講game講到商機自來之餘,最近索性自家開發手機遊戲,呢啲咪就係男人的浪漫囉。


一個月黑風高的晚上,葵芳一棟工廈單位燈火通明,甫進門見到一班低頭族塞爆走廊,「佢哋等緊開台。」網台JapHK創辦人之一的梁承澧(Louis)說。YouTube上有個名為JapHK的網台(現稱JapHK LIVE),專講日本和香港ACG(動漫和遊戲)資訊。11個節目18個主持,收工後趕來客串開台講打機,「放工後就奉獻晒喺呢度,係啊,同做多份正職差不多,呢度咪就係我第二個家囉。」



獲遊戲代理邀做顧問

部份網台只得一節節目講打機, JapHK則是每節節目只講一隻手機遊戲,瀏覽量平均只數以千計,同那些當紅YouTuber比簡直冇得比,但這班巴打貴在自娛,試過除夕夜節目直播連續講足9小時,吸引到數千名機迷聽眾陪一齊癲住過年,講到翌晨6時依然仲有200人在線。講得手機game多,心中自有一套理想遊戲雛形,其中十人今年索性集資25至30萬元,開發自己的新遊戲,計劃於暑假前面世。Louis透露:「係一隻將打架同踢波元素撈埋一齊的熱血足球game,入唔入到波係其次,最緊要打低對方。」一切追溯到2013年底,起初開台,其實只係得從事餐飲的「80頭」Louis,聯同平面設計師、70後友人陳栢桓(台長),一個曾從事台灣多間Online game公司的項目經理,另一個做過本地game書編輯,當時只為分享一款足球手機遊戲心得。台長用單反相機拍片,Louis就用一支箱頭筆、一塊白板出鏡教打機,然後將段片放上YouTube,話咁快就有過萬人點擊,既然有人睇有市場,兩個打機友以月租6,000多元,租一個450呎的工廈單位做節目直播。
Louis表示,由只係講一隻game,去到而家有11個節目講11隻game,呢班主持只係當日素未謀面的聽眾,因為唔滿意佢講嘅內容,就被邀上來「挑機」做嘉賓,就咁做埋主持。「更加估唔到的,係原來有遊戲代理留意。」開台以來,JapHK獲數間遊戲代理邀請做顧問,幫手諗計推廣,早前就有間台資遊戲代理,想打入香港市場,留意到佢哋節目有講代理的遊戲,於是就提出合作。至今已參與十多項相關工作,因而累積近6位數收入,促成自家製一隻本地手機遊戲的理想。雖然有錢賺,不過Louis多次強調自己唔係YouTuber,唔會做「職業攻略」,「我哋係ACG的Uber,一有新資訊就會隨傳隨到,隻game做得唔好我哋會照鬧,唔通屎都講係好食的咖喱咩,對方搵得我哋合作,就要接受我哋風格。」



兩個打機友台長陳栢桓(左)和Louis(中),初時開台純粹想分享打機心得,誰知越講越專業,開台以來,現最少聚集到18個同好收工後一齊做節目主持。

台資遊戲《六龍御天》最近搵來「英雄輝」港足門神葉鴻輝出任代言人,就係搵JapHK諗計建議。



節目完聽眾送茶慰勞

開台兩年多,所耗時間實不少,Louis繼續開台,皆因巴打的人情味:「有次節目直播俾聽眾鬧,話做乜咁hea,內容咪上星期講過,搞到主持怒喝,話已經無私分享研究整個星期的心得,連茶都自己買……唔知係咪因為呢句,節目11點半完,唔夠15分鐘,有聽眾就親自將3箱烏龍茶送畀我哋,仲大喝一聲:『嗱,唔好話冇你哋心,茶呀。我仲記得當時第一句係:多謝你啊,但你叫乜名?』佢話佢叫阿文。」網台規模開始有聲有色,Louis和台長的終極目標,希望將JapHK成為香港一個可以舉足輕重的ACG平台,Louis說:「《男兒當入樽》安西教練講過:如果你放棄的話,比賽就到此結束。我覺得能夠認真做一件事,就有值得繼續的價值,我哋可能會開台開到破產為止,希望可以喺香港成為咁都唔死的傳奇。」



【JapHK進化史】




白板時期2013年9月

一部單反拍攝再事後上載到網上,一支筆、一塊白板就咁講打機心得。10,000點擊率(非直播)節目主持:1個




發展時期2013年10月至2014年

一星期逢周三8時直播3個節目,開始有mic、有聊天室畀聽眾即時留言,佈景板貼咗張紙顯示網台icon,夠晒低成本。直播聽眾:數十人節目主持:3、4個



成形階段2015年至今

逢周一至五晚上8時至凌晨1時,一星期共有11個節目,風雨不改。直播聽眾:平均逾300人(高峯期有2,000人同時上線)節目主持:18個







記者:余 瑋攝影:徐振國編輯:黃仲兒美術:楊永昌





來源: http://hk.apple.nextmedia.com/su ... t/20160124/19462897
專題 收工 開網 網臺 Game 有錢
PermaLink: https://articles.zkiz.com/?id=294966

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019