拆解「發輪供」組合財技 高仁
1 :
GS(14)@2015-11-02 00:23:56拆解「發輪供」組合財技
法輪功的宗教性質曾引起熱議，高仁坦白說並沒有作出深入研究；但對於上市公司的「發輪供」組合財技，高仁與「豬朋狗友」程更計倒是瞭如指掌，可以與各位「巴打」分享一下。
在披露對話實錄之前，請各位「巴打」與「絲打」看看人物背景，簡介如下：
沈繼司─核數師，熟悉會計制度、對數字敏感，但對外面世界一無所知；
程更計─本地證券行經紀兼財務顧問，除了招呼散戶之外，亦向上市公司出謀獻計。
沈繼司：（正在燒烤厚切砂肝）點解我哋今晚嘅飯局，唔係去一直去開嘅中環鏞記，反而落咗嚟銅鑼灣食「燒肉」嘅？
高 仁：因為戴Sir今晚唔得閒出嚟食飯，所以我哋咪諗住搞搞新意思囉！
程更計：喂！睇吓你燒緊嗰嚿厚切砂肝，似唔似頭先樓下SOGO活取嗰啲。
沈繼司：死仔，有冇搞錯呀！食緊嘢，講埋啲咁嘅嘢，咁恐怖。
高 仁：法輪功！？Mmm……我就唔識嘞，但我識得「發輪供」。
沈繼司：高仁，我唔明你講緊乜嘢喎。
程更計：沈繼司，你試吓用普通話拼音講「法輪功」嚟聽吓。
沈繼司：fǎ lún gōng。
高 仁：而我嗰個嘅拼音係fā lún gōng。
程更計：高仁講緊嘅就係上市公司嘅「發輪供」囉！
高 仁：其實，上市公司「發輪供」即係發行「窩『輪』」（認股權證、購股權）加「『供』股」（供股、公開發售），兩者結合嘅組合財技。
沈繼司：Sorry！我真係一頭霧水。究竟點解要咁做？同埋咁做有乜嘢好處？
港交所基本已禁止
程更計：不過，呢一個上市公司「發輪供」組合財技， 基本上已經被個會（即係港交所）banned咗。
沈繼司：吓！點解呀？
高 仁：因為，當上市公司發完一批Options，之後又建議供股，嗰批Options就要調整認購價，對Options持有人相當着數，有違上市規則。
程更計：等我用例子解說一下啦！譬如，A公司已發行股份數目有1億股，發行咗佔已發行股數一成嘅Options，即係有1000萬份Options。現時，公司股價係1元，而Options行使價亦都係1元，咁幅picture會係點？
沈繼司：咁即係，A公司現時有1億元嘅市值，而Options總行使價值，就係1000萬元【表1】。
高 仁：如果A公司建議大比例供股，基準係1股供4股，每股供5毫子，結果又會係點。
沈繼司：除權之後，A公司理論股價會下降至6毫子，但擴大後發行股數會增加至5億股，公司市值就膨脹至3億元。
發輪後供股須調整
程更計：記唔記得之前嗰批Options呀？Options持有人會按照供股比例，獲得相同比例分配基準，最終變成有5000萬股認購權。
高 仁：由於Options總行使價值係1000萬元不變，但而家變成有5000萬股認購權，即係話行使價會大幅下調至2毫子【表2】。沈繼司，你覺得會變成點樣？
沈繼司：Mmm……
程更計：仲要諗！？佢哋咪好似法國鵝肝咁，隻鵝俾人強迫灌食，最終食到個鵝肝脹卜卜。
沈繼司：兩位大佬，小弟真係唔係好明白，究竟箇中有乜嘢財技。我決定將呢兩嚿燒好嘅黃沙肝畀兩位慢慢享用，等你哋可以繼續「過料」畀我。
（飯局未完，下周待續）
本欄逢周一刊出
歡迎交流上市公司的財技個案及招數，請電郵至
[email protected]。
#高仁 #財經拆局 #財圈識真假 - 拆解「發輪供」組合財技