49歲周海媚感情事隨緣 感激家人冇俾壓力
1 :
GS(14)@2016-08-21 08:11:03曾經為細7年嘅建築師男友而北上發展嘅周海媚(海味)，日前喺台灣出席活動，自爆同男友分咗手，事後佢嘅經理人回覆《蘋果》只係話相信大家都係成年人，一定係經過思量，做最好嘅決定。昨日有周刊報道，講到呢段10幾年嘅感情完結，海味話其實喺舊年已分咗手，大家嘅感情慢慢轉淡，曾經有試過挽救，不過唔成功，所以最後和平分手。海味仲話曾有人影過疑似係男友嘅相片，查實只係一個美麗嘅誤會：「我哋拍拖好少影相，分咗手之後都剷走晒啲相，我唔想因為自己而影響佢嘅生活，嗰個疑似男友係一個做製作人嘅朋友。」回復單身後嘅心情，海味話冇情傷，亦都冇時間唔開心：「其實喺呢段時間，男友都有求過婚，佢亦都想我退出娛樂圈，不過我唔鍾意做家庭主婦，嗰陣大家都有傾過，最後係我唔想結婚。」佢仲話好感激屋企人從來都冇俾任何壓力，好多事喺佢角度去諗，只要佢開心就可以。至於追求者方面，海味話：「冇呀，我覺得結唔結婚都冇乜所謂，隨緣喇！」
來源:
http://hk.apple.nextmedia.com/entertainment/art/20160821/19744775