2011-11-20 AD
東驥基金龐寶林與好友陳傑文在香港會設午宴招待三十位賓客，請來國際病理學權威，專門研究幹細胞治血友病、糖 尿病、癌症嘅馬鈺波（ Yupo Ma），講解幹細胞與骨髓研究之最新發展。馬教授畢業於內地大學，後赴美深造，得西雅圖華盛頓大學醫學院碩士，南阿拉巴馬大學醫學博士，哈佛大學醫學院博 士後，曾任布朗大學住院醫師，內華達州癌症研究臨床醫生、教授、幹細胞研究主任，現任紐約州立大學石溪分校（ Stony Brook）病理學教授及血液病理專科醫生培訓主任，來頭好巴閉。左丁山對科學方面連識少少扮代表嘅資格都冇，聽到一嚿雲，不過坐在隔籬嘅有一位校友係生 物化學博士，佢就聽到津津有味，話馬教授講得相當實在，有實用應用價值喎。
在座「聽書」者包括科技投資基金人士、金融顧問、分析師等等等。左丁山 唔多明白如何利用幹細胞醫治血友病與糖尿病，對生物科技投資就聽得好明，不過在座既有投資基金專業人士，唔輪到左丁山講嘢，於是索性向分析師 M請教：「喂，今日有報紙報道電盈分拆香港電訊，以商業信託（ Business Trust）形式上市，報紙唱淡，話冇乜人以孖展認購，你點睇？」
分析 M話：「第一點要緊記，在股市波動時期，唔好做孖展，唔好沽 Call、沽 Put，否則輸死冇人知，我樓下看更就因此虧損咗二十萬元，日日苦瓜乾咁，散戶唔做孖展認購 HKT信託係啱嘅，證明散戶成熟，但有真金白銀呢，就不妨認購呢隻香港電話商業信託噃，我對公司客戶推薦㗎，最啱食息之人。 2012年預計最少分派二十五億七千幾萬元，股息幾好啫， 7.5%至 8.9%之間，去邊處搵呀，係人都知， BT係冇得炒嘅，只宜長揸食息，夠高息就可以對抗通脹！」聽分析 M講，買 HKT信託好還是買 iBond好？分析 M話：「當初夠有不少專家唱淡 iBond啦，依家已升咗上去，冇乜肉食。 HKT信託唔係 iBond，無可比較，但生意與現金流相當穩定，想快上快落食大茶飯，可以博騰訊，但唔想心臟跳動嘅，都係買 HKT信託安樂啲！」分析 M似乎言之有理噃，幾十歲人何必買騰訊呢類股票吖，認購 HKT信託就唔會傷脾胃。