真．《回到未來》預言科技幾多成真？
1 :
GS(14)@2015-10-21 17:38:07等咗咁多年，呢一日終於到啦！今日10月21日除咗係重陽節假期之外，仲係電影《回到未來2（Back to the Future II）》入面嘅未來嗰日。數吓手指，《回到未來2》已經係1989年嘅作品，當時電影對未來嘅幻想同預測，26年嚟逐一成真，好似主角Marty喺未來嘅高科技屋企，無論係指紋門鎖、聲控設備，定係大電視視像通訊，對好多人嚟講已經係日常生活一部份。電影提到嘅娛樂工具近年亦都開始流行。Marty畀戲院門口嘅虛擬「大白鯊」嚇親，就類似而家成日睇嘅3D電影；可以睇電視嘅眼罩同唔用手制打機，微軟Xbox嘅Hololens眼鏡同Kinect已經做到晒。熟悉電影嘅Fans，一定記得Marty喺用過一塊飛行滑板趕路，上年已經叫一間叫Hendo嘅公司已經成功研究咗出嚟，而今年日本凌志車廠亦都造咗個飛行板原型，相信不久將來會正式面世。仲有一樣嘢相信好多人（尤其係懶人）應該好有興趣，就係自動綁鞋帶波鞋。呢種咁方便嘅設計一直有好多人想做，但直至近期Nike先正式預告話會推出，而佢講嘅時間仲係今個月，唔知會唔會喺聽日公佈呢？講咗咁多神預測，當然都有啲嘢係預計唔到。電影今面講到未來世界Fax機係主要通訊設備，實情係好多人都唔再用Fax，只要用手機一篤就搵到地球另一邊嘅佢。講開又講，電影度完全冇諗過會有互聯網出現，只能夠感嘆一句，科技呢家嘢我識條鐵咩。費清＃要生計，也要生活＃毋忘初衷
來源:
http://hk.apple.nextmedia.com/news/art/20151021/19341622