ZKIZ Archives


第四個中心 左丁山

2011-11-10  AD

餐飲 M賣西班牙葡萄酒,餐廳 R賣意大利酒,生意同樣幾好,旅發局主辦嘅美酒佳餚巡禮前星期在西九海濱長廊舉行,係 B2C展覽,超過十六萬人入場,上星期在會展舉行,由貿發局主辦嘅「香港國際美酒展」,係 B2B展覽,以參展商為主,最後一日開放俾公眾入內,亦有幾萬人到場,可見香港人對於葡萄酒(主要係紅酒),有極大興趣。
今屆香港國際美酒展以意 大利為夥伴國家,意大利酒商空群而出,有二百幾家來港,餐廳 R自然好高興,大力捧場,據佢講,香港入口紅酒品種繁多,但香港人與亞洲人對法國酒情有獨鍾,意大利酒雖然唔曳,只係佔一小部份市場,故此意大利商人對開 拓香港市場流晒口水,今次全力以赴。此外,有 37個國家, 930家酒商來港,包括拉脫維亞、以色列、馬耳他,以至格魯吉亞。咁多地區嘅酒商來港,路途遙遠,所費不菲,事先應該諗過度過,認為非來不可,以免蝕章, 先至參展嘅啫。
商人遠征,無非為錢,今年頭三季香港葡萄酒入口 73億元多,比去年升 57%,葡萄酒出口有 15億,比去年升 48%,香港何來有葡萄酒出口?相信係轉口啫啩,一位對紅酒買賣有認識嘅人士對左丁山講:「四年來香港紅酒生意大幅度上升,當然係拜葡萄酒入口免稅所賜, 冇咗稅,呢行即刻興旺晒,帶動新就業,迅速將香港提升為世界紅酒拍賣中心,曾特首心中懸掛香港要成為三大世界中心,一是人民幣離岸業務中心,二是融資( IPO、點心債、銀團貸款)中心,三是資產管理中心,將香港與紐約、倫敦並列,雖然未必一定可以第一,但不能脫離紐倫港並稱之名。他日如果香港有一位唐特 首,佢會講香港係世界四大中心,加多一個,就係紅酒中心嘞,小小一個香港,能夠成為世界四大中心,你話我地幾威呢!」唔,威唔怕認,若然如此,香港成為世 界紅酒中心,無法子不歸功於唐司長,但要倚賴大陸同胞呢,冇內地人市場,香港何來有咁大生意?知情人士云:「非也,若非我地有制度,有效率,外國拍賣商未 必會來香港拍賣名酒嘅啫。香港前年超越倫敦,去年超越紐約,今年拍賣紅酒總值超過倫敦加紐約,穩居世界第一,紅酒方面,香港係港紐倫之首呀!」

PermaLink: https://articles.zkiz.com/?id=29155

Next Page

ZKIZ Archives @ 2019