ZKIZ Archives


邵仲衡炒股過來人「似食鴉片,始終輸凸」

1 : GS(14)@2015-04-23 02:16:10

■邵仲衡表示丁孝蟹一角,原型來自《淚眼煞星》的殺手主角。攝影:陳志嵐


邵仲衡在《大時代》中演丁蟹長子丁孝蟹兼黑社會大佬,他早前在尖沙嘴接受訪問,談起近日《大》劇重播引起坊間迴響時,笑笑口說:「諗番都幾好笑,一套劇咁耐出番嚟,啲人有咁大嘅反應,做呢行嘅人係咪要諗吓點解、係咪做創作嘅人冇咁企理呢?做呢行生意嘅小組領袖要諗諗。而家間唔中至有呢啲所謂神劇,唔得㗎,一年至少要有一兩套先夠。」


【邵仲衡】丁孝蟹,丁蟹的長子,黑社會「忠青社」的龍頭,其後與方婷相戀,但因父親丁蟹入獄,為報仇命令手下將方婷等人拋落樓。

「困住兩日兩夜拍」

之前《大》劇每次重播都會有人提起,亦不會覺得過期,邵仲衡說:「我之前喺內地做嘢仲成日播,而家啲人仲知道我係孝蟹。係啲髮型、衣着有啲突兀囉,戲(劇情)就唔會過期,可以話冇乜時間限制。一世人參加過呢啲製作好過癮,夠晒嘞。」他表示拍攝時可以用「瘋狂」來形容,在片廠搭出聯交所,日以繼夜拍攝:「一拍就拍幾日幾夜唔返屋企,因為要就個景,以前衰極都有幾個鐘休息。《大》劇係不停困住喺個廠兩日兩夜,拍晒為止,拍到第三日至完,梳洗咪喺公司搞掂。嗰時TVB會出封感謝信,感謝你無私奉獻。」當年的劇本邵仲衡表示是無出其右,除了韋家輝之外還有編審曾謹昌,他形容二人合作就算不是天下無敵,都是認了第二沒人敢認第一。當年孝蟹的角色原型是來自日本漫畫《淚眼煞星》,他說:「初頭海報我張相隻眼有滴眼淚喺度,佢出場好有氣勢,你見佢講嗰句『我連最心愛嘅女人(李麗珍)都可以推落街』就知佢有幾狠辣。個原型係來自《淚眼煞星》嘅殺手主角,就算孝蟹跳樓自殺嗰場,佢都比其他兄弟更加有決心。」


■曾瞓身玩股票的邵仲衡,表示炒股會令人改變對錢的概念,絕非好事。

「丁蟹效應一定有」

對於電視台重播《大》劇,邵仲衡覺得會引發「丁蟹效應」,他分析說:「丁蟹效應一定有,啲人已經認同咗有呢樣嘢,呢個效應幾好呀,有藉口沽貨。同埋股市其實係同人心有關,人心認定咗有呢件事,呢件事就存在會出嚟沽貨。」他覺得原理跟股市圖表一樣。離開電視台後邵仲衡從事改裝越野車生意,在公司閒來無事就對着電腦炒股票,每日買入買出的股票價格達七位數,他說:「有位世叔伯周南(爪皇系已故馬主)同我講『唔好玩呀,都冇用㗎,好似食鴉片煙咁,贏幾多死番落去,始終都輸凸。」經過幾年炒股生活後,邵仲衡卒之抽身而出:「玩玩吓你就會玩即日鮮、篤手指,真係好壞品,對錢個概念錯晒,覺得嗰啲唔係錢嚟,有時仲為啖氣。你問我,未玩過唔好玩,玩緊嘅而家趁好(市)放晒佢。」撰文:何永寧場地提供:The Air(The One)





來源: http://hk.apple.nextmedia.com/entertainment/art/20150422/19120827
邵仲 仲衡 炒股 過來人 過來 似食 鴉片 始終 輸凸
PermaLink: https://articles.zkiz.com/?id=289843

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019