📖 ZKIZ Archives

再入校園 左丁山

2011-10-24  AD

地產基金董事總經理 S好多時不在香港，為尋找亞洲地產投資機會，幾乎個個禮拜都要飛一次，話約食午飯，講咗幾個月都未成事。呢日突然打電話嚟：「喂呀，如果咁啱今日未約人， 一齊食晏嘞。」左丁山適逢冇約會，正在心思思，食飯盒好呀，還是上 FCC，收到董事 S電話，合晒心水，於是立即一齊走上上海總會吃嫩雞煨 麪，好食吖，水準經常保持，但埋單時，價錢好似貴咗幾多噃？百二蚊一碗。前幾個月應該係幾十蚊啫！食物通脹逼人來，幾難頂。
基金 S話佢自己飛得太多，年紀漸大，認為自己應該慢下來，正安排自己升上神檯做主席，交棒俾年青人做董事總經理，因為飛少咗，有番啲時間，受邀請入咗香港大學 修讀一個碩士課程，後年攞碩士學位。左丁山聽到，幾乎噴 麪：「讀乜嘢碩士呀？讀嚟做乜，你唔駛靠張沙紙博升級啫。」董事 S話：「此乃我一生夢想，當年我考入港大建築系，想話做建築師，但因家窮冇錢，老竇叫我棄學去打工，等細佬妹可以讀上去。於是我以中七生資格，在社會打滾 咁多年，仔女已大學畢業，有碩士學位，我依家要一圓大學生之夢，入港大讀過，當然係讀我識得啲嘅地產課程！」左丁山大笑：「威記畢業，威到依家，算係咁 啦，你啲教授邊度有你識得咁多地產實務呀，你教番佢地啦！」
董事 S話：「實務當然我識晒，主要係學番啲理論去拋幾句啫，好似 Change Management咁，都要識噴口水㗎！」

 

以前香港冇咁多大學生，中學生只要肯上進，努力做事，出人頭地大有機會，董事 S係一個，佢話佢嘅同學亦係未上大學，由銀行最低層做到亞洲區主席，另一位由信差做到銀行交易室主管，威風八面，不過，呢啲機會過往在美資銀行先至有，在 英資洋行做 Boy出身，成世人最叻做到 Head Boy出入主席辦公室而已。當然，全港中學畢業生人辦就係曾蔭權，中七生做到特區政府之首，可說空前絕後嘅架勢堂人馬（所有創業家/企業家/大富豪唔計， 只計打工仔）！
食到一點半，董事 S話埋單咯，要返公司做功課，唔係基金投資啲「功課」噃，係港大碩士課程啲功課呀，搞好晒自有秘書編排整理，彩色打印，或 e俾教授，慳番佢唔少時間！

PermaLink: https://articles.zkiz.com/?id=28839
Next Page
ZKIZ Archives @ 2019