📖 ZKIZ Archives

幼稚園到大學 左丁山

2011-10-26  AD

窩輪高人靚女 K為二歲兒子搵幼稚園，左丁山呢輩難以理解；自己根本未讀過幼稚園，送兒女入幼稚園時冇特別選擇，只求方便，送佢地入兩間好少功課做，教好少英文嘅幼稚園讀，所以兩人特別活潑，口多多，大過咗就變成口齒伶俐，唔怕醜，易結交朋友。
或 者依家時代唔同咯，幼稚園教育好鬼巴閉，學費貴過大學，要求多籮籮。 i-banker窩利士位太太懷孕七月，已經周圍搵幼兒園，幾間國際級學校都話：「你等吓先啦，仔女都未出世。」但山頂嗰間名校對窩太講：「我地係有孕婦 前來報名登記先嘅！」窩太本人在對冲基金做事，做女嗰陣本來玩得飲得，依家好緊張呀，猛咁「盡職審查」，為腹中塊肉搵幼兒園幼稚園資料。
讀大學之 時，修讀一位日本訪問教授之「明治年代日本經濟」，居然攞到 A+，教授講：「你有冇興趣去慶應大學跟我讀書？」左丁山唔識日文，少不更事，又唔識請教高人，即時直率咁答：「我唔識日文，點考呀，唔去咯。」教授笑而 不言，後來佢帶咗一位唔識日文嘅同學入慶應大學，方知道日本名教授權力好大，可以直接收生，通知大學備案登記便可，即使唔識日文，只要教授話得，一樣可以 入，去到日本咪上日文堂囉。知笨之後，向教授道歉，順便問：「日本學生點樣先至可以入慶應做本科生？」教授話：「最好先入慶大附中。」點入慶大附中？教授 話：「入慶大附小。」如何入慶大附小？教授話：「先入慶大幼稚園。我自己就係從慶應幼稚園出身嘅，我嘅兒子、孫子都係。」唉，一條龍辦事，唔怪得日本家長 送兒女入慶大幼稚園，懷孕時期已經開跑打拼！

 

今日香港又係咁，父母為爭取子女將來入大學，一開始就競爭入有名幼稚園、小學開始，緊張到 不得了。一位年青政府官員想送兒子進沙田石門一間學校，猛咁上網刨資料，咁勤力做乜？原來學校面試兒子之餘，要面試埋家長，睇吓家長是否明白該校之 vision and mission、教學理念，清楚知道學校是否真的適合佢嘅兒子，唔好勉強喎！官員事先咪唯有死背呢間學校嘅資料，猛話自己好認同囉！香港為何出現怪獸家 長，不難解釋！

PermaLink: https://articles.zkiz.com/?id=28838
Next Page
ZKIZ Archives @ 2019