📖 ZKIZ Archives

科網好過開賭 左丁山

1 : GS(14)@2014-08-26 22:09:41

http://hk.apple.nextmedia.com/su ... t/20140826/18844218\r\n\r\n                  中移動（941）呢隻大笨象股，沉咗好耐，最近大發神威，升咗十幾巴仙，五日內市值增加二千億元有多，大行紛紛睇好，但老牌股民以125元買入嘅，依然坐艇，即都唔笑。\r\n中移動係發佈中期業績之後先至全力向前衝嘅，左丁山有少許股票，係七十幾蚊買入嘅，特別留意佢嘅業績，截至2014年六月底止，半年營業額有3246.81億人民幣，淨利潤係571.42億，盈利率係17.78%，即係做一百蚊生意，賺咗十七個八，又幾好利錢噃。\r\n好奇之下，搵吓就手、同期宣佈嘅公司盈利比較吓，隻點石成金科網股騰訊（700）宣佈2014第二季業績，營業額197.46億元人民幣，股東盈利達58.36億，盈利率係29.55%，互聯網股比流動電訊股更加好賺。\r\n賭股又如何？澳博（880）係賭王何鴻燊皇牌企業，今年上半年營業額高達444.46億港元，純利係39.02億，盈利率只有8.7%，仲以為開賭場好好賺㖭，誰知不然，澳博嘅獲利能力麻麻地啫噃。\r\n最穩陣嘅公用電力股又點呀？中電（0002）呢隻老牌大藍籌，退休基金必定持有嘅派息股嘅2014年半年業績宣佈咗嘞，收入471億，純利67.2億，盈利率係14.26%，全靠印度澳洲方面嘅業務轉虧為盈，於是發電好賺過開賭，你信唔信？\r\n再睇吓機票價格甚貴，但恒常客滿嘅香港人至愛航空公司，國泰航空（293），上半年盈利雖說增長13倍，仍然只得3.47億，營業額就高達508.4億，盈利率只有很可憐的0.68%，做一百蚊生意，賺六毫八仙，真慘情，而且仲要靠上半年嘅燃油對沖賺咗0.24億元㖭，航空公司生意極難做，國泰CEO朱國樑仍然有黑頭髮，算佢好嘢。\r\n諗深一層，乜開賭都賺唔到大錢？唔多信，於是再查吓其他賭股嘅獲利率，Google Finance資料一目了然，最大濠江賭股之金沙中國（1928）嘅盈利率有25.7%，永利中國（1128）有25%，銀河娛樂（0027）有15.8%，美高梅中國（2282）有21.5%，幾隻大賭場嘅獲利能力都高過澳博好多，但仍然不及騰訊，唔怪得咁多人熱衷於科網股啦，做一百蚊生意，有近30蚊利錢咁多。千祈唔好做航空公司噃，生意大大，賺錢小小，兼要飽吃驚風散，都唔明點解仲係有人熱衷於開辦廉航！                                                        
PermaLink: https://articles.zkiz.com/?id=285203
Next Page
ZKIZ Archives @ 2019