📖 ZKIZ Archives

莊偉茵入選全球 100 左丁山

2011-10-18  AD

留意公關人與事，關注國際大勢嘅，會留意一個網頁 Influence100.com，呢日有一位公關界老友通知，國泰莊偉茵獲選為一百名最重要之「環球公司內部傳訊主管」之一。咁緊要，咪要恭喜阿 Quince！自己上網睇吓，果然搵到 The 100 Most Important In-house Communicators in the World名單內有國泰航空 Quince Chong之名，介紹佢：「一九九八年為企業傳訊經理，處理過機師與空中小姐工業行動、二○○○年升任為機艙服務總經理、二○○四年再升任為服務營運總 監、二○○八年出任企業事務總監」。呢一百位環球最重要嘅傳訊人物之中，有五成來自美國，約十二位來自英國，其他來自澳洲、巴西、中國、印度、馬來西亞、 俄羅斯、南非與若干西歐國家。粗看之下，美國大公司有 Intel、 Merck等等等內部企業傳訊主管入選，莊偉茵以香港公司（國泰）嘅香港女士身份入選，一班老友梗係戥佢高興啦！
不過莊偉茵好謙噃，來電郵話： 「事先完全不知情，係外國朋友祝賀我之時，先至知道自己僅僅名列全球 100名最重要傳訊人物，幾乎嚇親。但我一定要講，國泰企業文化講求謙遜，唔會大事宣揚，況且國泰同事特別係企業傳訊部同事一向努力工作，注重團隊成就， 所以我之入選唔係我個人榮耀，而係香港人與國泰嘅榮耀。」
點講都好，都係巴閉嘅嘞，莊偉茵係中大聯合書院畢業生，主修政政系，畢業後做酒店公關、 旅協公關，後加入國泰航空至今。中大盛產公關名人，恒生助理總經理張樹槐（新亞）就當選過香港最佳企業公關；上次為曾蔭權競選特首嘅公關係黃麗君與游淑儀 （新亞），與之力拼嘅梁家傑有公關代表陳慧兒（新亞），今次特首疑似候選人唐英年嘅公關係鄭麗敏、陳鍾坤（新亞），擺開陣式，各中大校友有排對撼。上述咁 多位，皆係記者出身，可見新聞界係培養公關人員嘅工場。某次左丁山到大學演講，一位新聞系學生問：「我想做公關，如何入行？」左丁山不假思索，叫佢做記者 捱一輪先！

PermaLink: https://articles.zkiz.com/?id=28510
Next Page
ZKIZ Archives @ 2019